Kristiano Ronaldo duket se ka lënë pas të gjitha problemet e pjesës së dytë të vitit 2012 dhe po tregon një formë të shkëlqyer në këto javë. Portugezi vazhdon të tregohet vendimtar me golat e tij, ashtu siç ka ndodhur në ndeshjen e sotme të Real Madrid kundër Selta Vigos, të fituar me rezultatin 2-1 nga madrilenët falë golave të CR7. 

Në një ndeshje ku Reali ka humbur shumë raste përballë kundërshtarëve që notojnë në vendet e fundit të renditjes dhe rrezikojnë rënien nga kategoria, diferencën e ka bërë pikërisht Ronaldo me dy golat e tij në pjesën e dytë. Fillimisht ai kaloi në avantazh skuadrën e tij, por vetëm dy minuta më vonë ishte Iago Aspas që vendosi barazpeshën për skuadrën e Selta Vigos. Por më pas erdhi edhe goli i dytë i Ronaldos, për të cilin ai duhet të falënderojë Kaka që fitoi 11-metërshin të cilin më pas lojtari portugez e transformoi saktësisht duke i dhënë suksesin skuadrës së tij.

Duhet thënë se Real Madrid ka regjistruar 9 rezultate pozitive në po aq ndeshje të luajtura në kampionat në vitin 2013, me 8 fitore e vetëm 1 barazim. Ndaj po të mos ishte për fillimin mjaft të dobët të sezonit, madrilenët tashmë do të ishin ende duke luajtur për titullin kampion kundër katalanasve e jo duke i ndjekur me 13 pikë diferencë kur mbeten 11 javë nga fundi kampionatit. (LajmeShqip.com)