Observuesit evropian kanë kritikuar procesin zgjedhor në Turqi, me ç’rast presidenti turk Reccep Tayyip Erdogan dhe partia e tij AKP rimorën mazhorancën parlamentare në vend.

Anëtarët e Organizatës për Siguri dhe Bashkëpunim në Evropë (OSCE) kanë thënë se dhuna gjatë fushatës zgjedhore ka penguar procesin e mirëfilltë zgjedhor, ndërkohë që Asambleja Parlamentare e Këshillit të Evropës (PACE) kanë shkuar edhe më larg, sa e kanë quajtur procesin të “padrejtë”, transmeton kp.

“Fatkeqësisht ne kemi ardhur në përfundim se kjo fushatë zgjedhore ishte e padrejtë dhe është karakterizuar me shumë dhunë dhe frikë. Dhe frika është armik i demokracisë, armik i zgjedhjes së lirë”, u ka thënë gazetarëve kreu i delegacionit të PACE-s, Andreas Gross.

“Euronews” raporton se të shtunën mbrëma ka pasur shpërthime dhune në qytetin pro-kurd Diyarbakir.

Partia Popullore Demokratike (HDP), e cila ka përkrahje të madhe në regjion ka pësuar humbje të madhe në zgjedhjet e së dielës. Kritikët e kanë akuzuar Erdoganin se e ka rikthyer dhunën për ta penguar mbështetjen ndaj HDP-së – gjë të cilën Qeveria e mohon.

Ndërkohë, edhe Shtëpia e Bardhë ka ngritur shqetësime rreth presionit ndaj gazetarëve, duke e pasur në mendje bastisjen e fundit të policisë turke në grupin medial opozitar “Koza-Ipek”, që njihet si media që kritikon ashpër regjimin e Erdoganit.

Nga 550 ulëse në parlamentin turk, 317 raportohet t’i ketë marrë AKP-ja e Erdoganit, ndërsa i duhen vetëm edhe 13 deputetë që ta mbështesin në mënyrë që ai të realizoj ndryshimet kushtetuese për t’i dhënë më shumë fuqi ekzekutive presidentit të vendit.