Sabotazh në derbin e Madridit mes Rajo Vajekanos dhe Real Madrid! Dy orë para ndeshjes që pritej të fillonte në orën 21:30, është mësuar se nuk punonte impianti ndriçues në stadium, jo për shkak të një avarie, por për shkak se një apo shumë persona kanë prerë kabllot e dritave.

Me mbërritjen e skuadrave në stadiumin e “Valekas” dhe me afrimin e tifozëve, drejtuesit e skuadrës së Rajos kanë menduar të ndezin dritat e impiantit, por kanë parë se ata nuk ndizen dhe kanë lëshuar alarmin, duke bllokuar si fillim hyrjen e tifozëve në stadium. Më pas, është kontrolluar me shpejtësi impianti i ndriçimit, ndërsa lojtarët e të dy skuadrave bënin nxemje në fushë në gjysmë errësirë, pasi mungonte ndriçimi elektrik në njërin krah të stadiumit.

Presidenti i Rajo Vajekanos, Martin Presa, konfirmoi për kamerat televizive se një apo shumë persona të paidentifikuar kanë prerë kabllot. “I kanë prerë dhe shkurtuar kabllot e ndriçimit të stadiumit. Po bëjmë maksimumin për t’i rivendosur por kërkon kohë pasi nuk është një procedurë e thjeshtë”, tha ai për “Canal+” ndërsa në stadium triumfonte kaosi.

Në orën 22, afati i fundit i vendosur nga Federata Spanjolle, u vendos që ndeshja të shtyhej për një datë të pacaktuar, ndonëse më shumë mundësi ka të luhet të hënën në darkë pasi Real Madrid nuk ka më asnjë mesjavë bosh deri në shkurt për të rikuperuar këtë sfidë.

“Nuk e dimë se kush janë sabotatorët dhe shiu që bie ka fshirë gjurmët e tyre. Ka elektricitet, por jo mjaftueshëm për të luajtur këtë ndeshje. Na vjen keq për tifozët por situata nuk është në dorën tone”, ishin fjalët e presidentit të vendasve, pasi u mor vendimi për shtyrjen e takimit në fjalë dhe dy skuadrat dolën në fushën e lojës, për të bërë një seancë stërvitore në vend të ndeshjes mes tyre. (LajmeShqip.com)

Primera Division

Java 5 / Rezultatet

Majorka-Valencia                            2-0

8’ Viktor, 55’ Arizmendi

Levante-Real Sociedad                   2-1

70’ (p) Barkero, 87’ Martins / 23’ Zurutuza

Atletiko Madrid-Real Vajadolid 2-1

31’ Godin, 45’ (p) Falkao / 55’ Bueno

Atletik Bilbao-Malaga                      0-0

Rajo Vajekano-Real Madrid e shtyrë

RENDITJA: Barcelona 15 pikë,  Majorka 11, Malaga 10, Atletiko Madrid 10, Betis 9, Sevilja 8, Rajo Vajekano 7, Levante 7, Selta Vigo 6, Real Saragoza 6, Deportivo La Korunja 6, Real Sociedad 6, Real Vajadolid 6, Valencia 5, Getafe 4,  Atletik Bilbao 4, Real Madrid 4, Granada 2, Espanjol 1, Osasuna 1.