Një paraqitje e shkëlqyer e Kevin Durant i ka dhënë mundësinë Oklahomas të fitojë me rezultatin 117-111 ndeshjen përballë LA Klipërs, duke i dhënë mundësinë nënkampionëve të NBA të rimarrin vendin e parë në Konferencën e Perëndimit. 

Pikëshënuesi më i mirë i tre sezoneve të fundit ka realizuar 35 pikë, 6 topa në tabelë, 5 pasime dhe 5 vjedhje në këtë sfidë që është vendosur në kohën shtesë. Megjithatë, arma më e fortë e Oklahomas në këtë sfidë ka qenë mbulimi që i është bërë Bleik Grifin, duke e kufizuar yllin e LA Klipërs me 23 pikë dhe vetëm 6 topa në tabelë, pasi ai është gjendur vazhdimisht i rrethuar nga mbrojtësit shtatlartë të nënkampionëve që nuk e kanë lënë të shfaqë shpërthimet e tij të zakonshme në lojën ofensive.

Një disfatë ka regjistruar nata e mbrëmshme edhe për LA Leikërs, që janë mundur në fushën e Sakramentos pavarësisht 38 pikëve të Kobi Brajant. Kjo ishte humbja e parë e kalifornianëve që në momentin kur drejtimin e skuadrës e mori Majk D’Antoni.

Ndërkohë, kampionëve të Majemit u është dashur një ndeshje perfekte e treshes së saj për të fituar ndaj Miluoki në kohën shtesë. LeBron Xhejms ka shënuar 28 pikë, 10 topa në tabelë e 68 pasime, i ndihmuar nga Kris Bosh me 24 pikë e 18 topa në tabelë si dhe Duejn Uejd me 28 pikë, për të përmbysur një disavantazh prej 13 pikësh në minutat e fundit të këtij takimi dhe për ta çuar në kohën shtesë, ku ka mbizotëruar eksperienca e kampionëve të NBA. (LajmeShqip.com)

Rezultatet

Filadelfia-Kliveland        83-92

Detroit-Orlando             74-90

Nju Orlins-Indiana          107-115

Toronto-Sharlot             97-98

Miluoki-Majemi               106-113

San Antonio-Boston       112-100

LA Klipërs-Oklahoma     111-117

Uashington-Atlanta        100-101

Denver-Minesota           101-94

Çikago-Hjuston               89-93

Nju Jork-Dallas               111-114

Portland-Feniks              87-114

LA Leikërs-Sakramento  97-113

Bruklin-Golden Steit        93-102