Majemi ka arritur të fitojë në Kliveland vetëm me lojtarët rezervë, duke lënë pushim të gjithë lojtarët titullarë, për t’i pasur sa më të çlodhur para fillimit të playoff. LeBron Xhejms, Kris Bosh dhe Mario Çallmers qëndruan në stol pa u aktivizuar gjatë të gjithë ndeshjes, ndërsa Duejn Uejd, Shein Batier dhe Udonis Haslem, as që kishin udhëtuar për këtë sfidë që Majemi e fitoi me rezultatin 96-95. 

Gjithçka u vendos në minutën e fundit nga organizatori i kampionëve në fuqi, Norris Kol, i cili i vodhi topin yllit të Kliveland, Kairi Irving, për të mos i dhënë mundësinë këtij të fundit të tentonte një gjuajtje për fitoren. Kol e mbylli ndeshjen me 16 pikë, 11 topa në tabelë dhe 9 pasime.

Në Konferencën e Perëndimit, Oklahoma siguroi përfundimisht vendin e parë dhe avantazhin e fushës në playoff pas fitores 104-95 ndaj Sakramentos. Kevin Durant ishte protagonisti i mbrëmjes duke shënuar 29 pikë në këtë sfidë që i dha skuadrës këtë arritje shuam të rëndësishme në historinë e saj. Tashmë e vetmja gjë që ka mbetur për t’u përcaktuar në dy ditët e fundit të sezonit të rregullt në NBA, është nëse në playoff si skuadra e 8-të në Konferencën e Perëndimit do të shkojë LA Leikërs apo Utah. (LajmeShqip.com)

Rezultatet

Nju Jork-Sharlot          95-106

Majemi-Kliveland         96-95

Çikago-Orlando           102-84

Filadelfia-Detroit           101-109

Uashington-Bruklin       101-106

Memfis-Dallas              103-97

Utah-Minesota             96-80

Sakramento-Oklahoma 95-104

Denver-Miluoki            112-111

Hjuston-Feniks 112-119

San Antonio-Golden Steit         106-116