LA Leikërs më në fund janë ngjitur në zonën e playoff duke marrë përkohësisht vendin e 8-të në Konferencën e Perëndimit, pas një sezoni me shumë vuajtje. Ky pozicionim mund të quhet një sukses për kalifornianët, të cilët kanë një rekord 33-31, falë suksesit 90-81 ndaj Çikagos. 

Në një ndeshje shumë të luftuar, është dashur ndihma e të gjithëve në radhët e kalifornianëve, ku 6 lojtarë shënuan 10 a më shumë pikë. Kobi Brajant udhëhoqi si zakonisht skuadrën e tij me 19 pikë, 7 topa në tabelë e 9 pasime, ndërsa këtë radhë edhe Duajt Hauard u paraqit në një formë të shkëlqyer me 16 pikë e 21 topa në tabelë.

Një tjetër ndeshje e rëndësishme ishte ajo mes Indiana dhe Majemi, me kampionët në fuqi të NBA që fituan me rezultatin 105-91 dhe çuan në 18 numrin e fitoreve radhazi. Ndonëse LeBron Xhejms shënoi vetëm 13 pikë, 7 pasime e 6 topa në tabelë, ishte pjesa tjetër e skuadrës që bëri diferencën, me në krye Mario Çallmers që shënoi 26 pikë ndaj skuadrës që kishte mundur kampionët në dy takimet e mëparshme të këtij sezoni dhe shihet si rivali kryesor në Konferencën e Lindjes ndaj aspiratave të Majemit për të rifituar titullin. (LajmeShqip.com)

Rezultatet

Boston-Oklahoma        79-91

Çikago-LA Leikërs      81-90

Filadelfia-Orlando         91-99

Indiana-Majemi            91-105

Kliveland-Toronto        96-100

Portland-Nju Orlins      96-98

Dallas-Minesota           100-77

Miluoki-Sakramento     115-113

Detroit-LA Klipërs       97-129