LA Klipërs ka arritur që për herë të parë të bëhet skuadra dominuese e Los Anxhelos, pasi ka mundur në të katër ndeshjet e këtij viti skuadrën tjetër të qytetit, LA Leikërs, që nga viti 1981. Për kë tepër, LA Klipërs janë fitues për herë të parë të Divizionit të Paqësorit, një arritje e paimagjinueshme deri disa vite më parë kur ata ishin bërë skuadra me të cilën talleshin të gjithë falë dështimeve të vazhdueshme. 

Por tani LA Klipërs janë nisur drejt pjesëmarrjes në playoff pas fitores 109-95 pikërisht ndaj LA Leikërs që i kanë rrëmbyer të gjithë famën, ndërsa kanë arritur të nxjerrin dhe këta të fundit përkohësisht nga playoff, pasi i kanë zbritur në vendin e 9-të në Konferencën e Perëndimit. Kris Pol shënoi 24 pikë e 12 pasime ndërsa Bleik Grifin realizoi 24 pikë e 12 topa në tabelë për të marrë këtë fitore shumë të rëndësishme sidomos nga ana psikologjike.

Ndonëse Kobi Brajant zhvilloi një ndeshje mjaft të mirë në radhët e LA Leikërs, me 25 pikë, 7 topa në tabelë dhe 10 pasime, ai nuk arriti të merrte një fitore për skuadrën e tij dhe tani rrezikon që të shohë playoff nga televizori dhe jo si protagonist, ashtu siç ka bërë gjatë të gjithë karrierës së tij. (LajmeShqip.com)

Rezultatet

Nju Jork-Oklahoma       125-120

LA Leikërs-LA Klipërs   95-109

Memfis-Sakramento      89-87

Orlando-Kliveland         85-91

Uashington-Boston       96-107

Çikago-Detroit              85-99

Utah-Golden Steit         97-90

Nju Orlins-Feniks          95-92

Dallas-Portland             96-91