LA Klipërs në këtë sezon janë të pandalshëm, siç e tregon fakti se po thyejnë rekorde të njëpasnjëshme të historisë së klubit, duke u bërë ndër ekipet më të ndjekura në NBA. 

Në ndeshjen kundër Golden Steit, kalifornianët kanë arritur të fitojnë ndeshjen e 12-të radhazi në fushën e tyre, me rezultatin 115-89, si asnjëherë më parë në historinë e këtij klubi që shpesh ka qëndruar në hijen e LA Leikërs dhe nuk është cilësuar mes pretendentëve.

Kris Pol shënoi 27 pikë dhe 9 pasime ndërsa Bleik Grifin shtoi 20 pikë të tjera, me të dy yjet e ekipit kalifornian që nuk luajtën as deri në fundin periodës së tretë, pasi trajneri Vini Del Negro vendosi t’i ulte në stol kur diferenca mes dy skuadrave kishte shkuar në 36 pikë.

Një tjetër skuadër e ringjallur është ajo e Nju Jork, që në Konferencën e Lindjes vazhdon të duelojë kundër Majemit në luftën për vendin e parë, e udhëhequr nga Karmelo Entoni, në formë të jashtëzakonshme. Ylli i Nju Jork ka shënuar 40 pikë ndaj Orlando në suksesin 114-106 në transfertë, duke treguar se është gati për hapin e madh dhe se mund ta udhëheqë këtë skuadër drejt objektivave prestigjiozë, e pse jo titullit kampion, duke u kthyer vetë në kandidatin më të mundshëm të titullit MVP në këtë sezon. (LajmeShqip.com)

Rezultatet

Miluoki-Indiana              80-95

Boston-Atlanta              89-81

Nju Jork-Orlando          114-106

Sakramento-Bruklin       93-113

Hjuston-Kliveland          112-104

Portland-Minesota         102-97

Nju Orlins-Dallas            99-96

Filadelfia-San Antonio    86-109

Utah-Denver                   91-110

Golden Steit-LA Klipërs  89-115