Nëse LA Leikërs do të arrijnë të kualifikohen në playoff në këtë sezon të NBA, gjithçka do të jetë meritë e Kobi Brajant i cili ka treguar përsëri madhështinë e tij me një paraqitje mbresëlënëse në suksesin 108-102 ndaj Nju Orlins. 

Vetëm një natë pas humbjes përballë Oklahomas, ylli i skuadrës kaliforniane ktheu përsëri skuadrën e tij në rrugën e fitoreve pas një shfaqjeje të vërtetë të të gjitha cilësive të tij, për të realizuar 42 pikë, 7 topa në tabelë e 12 pasime. Kjo paraqitje frymëzoi edhe shokët e tij të skuadrës, me në krye Duajt Hauard që realizoi 20 pikë, 15 topa në tabelë dhe 5 bllokime, mes të cilëve një vendimtar në sekondat e fundit duke i hequr mundësinë Bruk Lopez të barazonte përkohësisht rezultatin. Tani LA Leikërs janë vetëm 2 fitore larg Utah që mban përkohësisht vendin e 8-të në renditjen e Konferencës së Perëndimit.

Në Konferencën e Lindjes, vazhdon marshimi i Majemit, që gjithsesi ka filluar të tregojë shenjat e para të lodhjes në serinë rekord të 16 fitoreve radhazi. Kampionëve të NBA u është dashur një kosh nga LeBron Xhejms vetëm 3 sekonda para fundit për të mundur Orlandon me rezultatin 97-96, në një takim me ulje-ngritje nga të dy skuadrat. Xhejms e mbylli ndeshjen me 26 pikë, ndërsa Duejn Uejd shënoi 24 pikë e 6 topa në tabelë. (LajmeShqip.com)

Rezultatet

Boston-Indiana 83-81

Utah-Kliveland 101-104

Bruklin-Sharlot 99-78

Nju Jork-Detroit           87-77

Orlando-Majemi           96-97

Filadelfia-Atlanta          96-107

Portland-Memfis           85-91

Uashington-Minesota    82-87

LA Leikërs-Nju Orlins  108-102

Hjuston-Dallas  108-112

Çikago-San Antonio     83-101

Toronto-Feniks            98-71

Miluoki-LA Klipërs      101-117

Sakramento-Golden Steit          83-87