Majemi ka treguar përsëri se është një skuadër e kompletuar edhe në stolin e rezervave në rrugën e saj drejt titullit të dytë kampion radhazi, pasi ka arritur që pa titullarët të fitojë kundër Uashington me rezultatin 103-98 për të vendosur rekordin e ri të klubit me 62 fitore në një sezon. 

LeBron Xhejms, Duejn Uejd, Kris Bosh dhe Udonis Haslem kanë qëndruar të gjithë pushim për këtë sfidë, duke i lënë vendin “zgjedhjeve të dyta”, të cilat arritën që njëkohësisht të realizonin ndeshjen me më shumë tentativa për 3 pikë, duke gjuajtur 41 të tilla, por duke realizuar vetëm 17. Realizuesi më i mirë në këtë ndeshje ishte Rei Alen me 23 pikë të shënuara. Në radhët e Uashington shkëlqeu i zakonshmi Xhon Uoll, me 17 pikë, 9 topa në tabelë e 11 pasime, ndërsa tregoi edhe një herë se është transformuar në një nga organizatorët më të mirë të NBA.

Paraqitja më mbresëlënëse gjatë natës së mbrëmshme ka qenë ajo e Kobi Brajant, i cili ka realizuar 47 pikë në fitoren 113-106 të LA Leikërs përballë Portland. Ylli i kalifornianëve pati një ndihmë të madhe edhe nga shokët e skuadrës, me Pau Gasol që përfundoi takimin me 23 pikë, 7 topa në tabelë e 9 pasime, ndërsa Duajt Hauard shtoi 20 pikë e 10 topa në tabelë. Për Portland vazhdon të shkëlqejë debutuesi Damian Lilard, i cili realizoi 38 pikë në sfidën përballë skuadrës së një prej idhujve të tij. (LajmeShqip.com)

Rezultatet

Atlanta-Filadelfia          124-101

Majemi-Uashington      103-98

Detroit-Kliveland          111-104

Miluoki-Orlando           103-113

Bruklin-Boston 101-93

Feniks-Dallas               102-91

LA Leikërs-Portland     113-106

Nju Orlins-Sakramento 110-121

Minesota-LA Klipërs    95-111

San Antonio-Denver     86-96