Majemit i është dashur të djersijë shumë për të mundur ekipin më në formë të NBA në fazën ofensive, Hjuston, që deri para natës së mbrëmshme regjistronte një mesatare të pabesueshme prej 118.5 pikësh në 6 ndeshjet e fundit. Por kampionët e NBA kanë arritur t’i mbajnë nën kuotën e tyre “normale” pasi i kanë mundur me rezultatin 114-108. 

Ndonëse Le Bron Xhejms (32) dhe Duejn Uejd (31) së bashkë shënuan 63 pikë, fitorja u vendos në fazën mbrojtëse, me tre aksione në periodën e fundit. Mario Çallmers dhe Udonis Haslem detyruan kundërshtarët të bënin faull në sulm, ndërsa Uejd bllokoi gjuajtjen për 3 pikë të Harden që mund të kishte barazuar përkohësisht takimin. Harden, një nga pikëshënuesit më të mirë të këtij sezoni, arriti gjithsesi ta mbyllte ndeshjen me 36 pikë, ndërsa të 5 titullarët e Hjuston shënuan 10 a më shumë pikë.

Rezultati i papritur i natës së mbrëmshme është humbja e Nju Jork në fushën e Uashington me rezultatin 106-96, pavarësisht paraqitjes të mirë të Karmelo Entoni me 31 pikë e 9 topa në tabelë. Uashington, ndonëse ka regjistruar vetëm 13 fitore në këtë edicion, 5 prej tyre i ka nga skuadrave që kryesojnë divizione të ndryshme, si për të treguar se potenciali për të bërë më mirë ekziston, por thjesht mungon qëndrueshmëria në rezultate. Diferencën në këtë sfidë e bëri perioda e katërt, ku Uashington arriti të shkatërronte mbrojtjen e Nju Jork për të shënuar 36 pikë. (LajmeShqip.com)

Rezultatet

Boston-Toronto              99-95

Indiana-Filadelfia            88-69

Nju Jork-Uashington       96-106

LA Klipërs-Orlando         86-76

Sharlot-Kliveland            95-122

Hjuston-Majemi               108-114

Bruklin-Detroit                 93-90

Memfis-Atlanta                92-103

Feniks-Nju Orlins            84-93

Golden Steit-Oklahoma   98-119

Portland-Dallas               99-105

Miluoki-Utah                    86-100

San Antonio-Minesota    104-94