LA Leikërs më në fund ka dhuruar një paraqitje të denjë për emrin e vet, duke mundur Denver me rezultatin 122-103, por meritë për këtë sukses të lojës ofensive nuk kanë yjet e zakonshëm të skuadrës, por zëvendësuesi Antaun Xhemison. 

Lojtari që është mes rezervave të ekipit kalifornian, realizoi 33 pikë e 12 topa në tabelë, duke u bërë rezerva e parë e ekipit kalifornian që kalon kuotën e 30 pikëve, që nga viti i largët 1998, atëherë kur Shakuil O’Nil sapo ishte kthyer nga një dëmtim. Duajt Hauard ishte ylli tjetër i mbrëmjes me 28 pikë e 20 topa në tabelë, ndërsa duhet theksuar se në këtë takim realizoi edhe trepikëshin e dytë të karrierës së tij.

Në ndeshjet e mbrëmshme kanë fituar thuajse të gjitha ekipet e mëdha, si Bruklin, Nju Jork e Boston në Konferencën e Lindjes, apo Memfis e Oklahoma në Konferencën e Perëndimit. Aktualisht në Lindje kryeson Majemi (11 fitore, 3 humbje), ndërsa në Perëndim vendin e parë e mban Memfis (12 fitore, 2 humbje). (LajmeShqip.com)

Rezultatet

Bruklin-Orlando           98-86

Filadelfia-Sharlot         104-98

Feniks-Toronto            97-101

Portland-Boston           78-96

Uashington-Nju Jork     87-108

Kliveland-Atlanta         113-111

Miluoki-Minesota          85-95

Detroit-Memfis              78-90

Utah-Oklahoma            94-106

Indiana-Sakramento     97-92

Denver-LA Leikërs       103-122