Joakim Lëv beson se fitorja 2-1 ndaj Holandës i ka hapur derën e çerekfinaleve skuadrës së tij, që tani ka si objektiv të fitojë Grupin B për të patur një kalendar më të favorshëm.

“Dëshironim shumë që të hidhnim këtë hap të dytë para. Ishte e rëndësishme për ne që të mbanim të njëjtin ritëm dhe tani dera e çerekfinaleve është e hapur. Besoj se do të jetë shumë e rëndësishme që të mundim Danimarkën në ndeshjen e fundit dhe të dalim të parët në grup, pasi do të ishte në të mirën tonë që të mos udhëtonim në Gdansk për në ndeshjet çerekfinale”.

Kuptohet që trajneri gjerman ka patur vetëm elozhe për dy futbollistët që vendosën fatin e ndeshjes me Holandën, Mario Gomez që dërgoi topin në rrjetë dhe Bastian Shvajnshtajger që në të dy rastet i krijoi mundësinë sulmuesit ta bënte një gjë të tillë.

“Të dy golat nga Gomez ishin të shkëlqyer. Ka vetëbesim që nga fillimi i sezonit dhe kjo është një gjë e mirë për të. Shvajnshtajger vazhdon të përmirësohet, po arrin të rritë praninë e tij në fushë dhe kur situata vështirësohet, arrin të mbajë topin. Ai është fizikisht mirë dhe fiton çdo dyluftim”, është shprehur trajneri gjerman që ka pranuar se kjo fitore ishte meritë edhe e paaftësisë së ekipit kundërshtar.

“Holanda shfaqi shumë pak ide dhe për këtë duhet të falënderoj edhe mbrojtjen tonë që rezistoi shumë mirë. Por kisha përshtypjen se Holanda ishte fizikisht e vdekur që pas minutës së 60-të të takimit”, ishte thumbimi i Lëv ndaj “tulipanëve”. (LajmeShqip.com)

Grupi B

Holandë-Danimarkë     0-1

24’ Krohn Dehli

Gjermani-Portugali        1-0

73’ Mario Gomez

Danimarkë-Portugali     2-3

41’, 80’ Bendtner / 24’ Pepe, 36’ Postiga, 87’ Varela

Holandë-Gjermani        1-2

73’ Van Persi / 23’, 38’ Mario Gomez

Renditja

Gjermani        6          3-1

Danimarkë     3          3-3

Portugali         3          3-3

Holandë           0          1-3

17.06.2012

Portugali-Holandë         20:45

Kharkiv (Ukrainë)

Danimarkë-Gjermani    20:45

Lviv (Ukrainë)