Mungon edhe një javë deri në fundin e fazës së parë të Bundesligës por Bajern Mynih i ka bindur të gjithë se do të shpallet kampion në Gjermani. Bavarezët janë të pandalshëm, ndërsa asnjë prej kundërshtarëve kryesorë të bavarezëve nuk arrin të mbajë hapin e tyre. 

Në ndeshjen e radhës, kundër Augsburg, skuadra e Heinkes ka fituar pa probleme me dy golat e Myler dhe Gomez, i cili duket se është kthyer në formën më të mirë pas problemeve fizike të fillimit të sezonit.

Me këtë sukses, Bajern ka një avantazh prej 11 pikësh ndaj ndjekësit më të afërt që është Bajer Leverkusën, i cili luan nesër në fushën e Hanover. Përsa i përket ndjekësve të tjerë, ka shkuar në plot 14 pikë distanca nga Borusia Dortmund, e cila mban vendin e tretë por u mund në fushën e saj nga Volfsburg.

Diferenca me Shalken e vendit të katërt është edhe më e madhe, 16 pikë, pas humbjes së kësaj skuadre në transfertën e Shtutgartit.

Si rrjedhojë, duket qartë se Bajern ka siguruar që tani një diferencë shumë të ndjeshme me ndjekësit, aq sa ka luksin të gabojë disa ndeshje radhazi dhe të vazhdojë të jetë i pari në renditjen e kampionatit gjerman. (LajmeShqip.com)

Bundesliga

Java 16 / Rezultatet

Augsburg-Bajern Mynih                        0-2

40’ (p) Myler, 63’ Gomez

Nyremberg-Fortuna Dyseldorf              2-0

27’ Polter, 90’ Folner

Borusia Dortmund-Volfsburg                2-3

6’ Reus, 61’ (p) Blaszczikovski / 36’ (p) Diego, 41’ Naldo, 73’ Dost

Fraiburg-Grojter Fyrth                           1-0

15’ Kalixhiuri

Shtutgart-Shalke                                   3-1

2’, 38’ (p), 61’ Ibisheviç / 12’ Marica

Eintraht Frankfurt-Verder Bremen         4-1

47’ Maier, 62’ Shvegler, 63’ Aigner, 90’ Inui / 53’ Petersen