Bajern Mynih ka vënë një dorë në titullin kampion të këtij sezoni në Bundesligë pas fitores së pastër 4-0 ndaj Shalkes, një prej ekipeve rivale të edicioneve të kaluara por që në këtë vit nuk po shfaqet në lartësinë e duhur. 

Bavarezët kanë treguar dominimin e tyre edhe pse trajneri Heinkes kishte lënë në stolin e rezervave dy golashënuesit më të mirë të ekipit në këtë sezon, Mario Manxhukiç dhe Tomas Myler. Dy gola të Alaba dhe rrjetat e Shvajnshtajger dhe Gomez kanë treguar forcën e vërtetë të bavarezëve që në këtë sezon nuk njohin kundërshtarë.

Këtë fakt e kanë pranuar edhe kampionët e Borusia Dortmund, që me humbjen 1-4 në shtëpi përballë Hamburgut, kanë bërë të qartë se tashmë kanë mendjen vetëm te paraqitja e tyre në Ligën e Kampioneve. Me 15 pikë diferencë, kur kanë mbetur edhe 13 javë deri në fundin e kampionatit, duket e pamendueshme që kampionët në fuqi të arrijnë të rikuperojnë ndaj bavarezëve.

Nga gara për titullin është tërhequr edhe Bajer Leverkusen, që ka barazuar 3-3 në fushën e Borusia Mynshengladbah. Ashtu si Dortmund, edhe futbollistët e Bajer Leverkusen dukej qartë që e kishin mendjen te ndeshja e Europa League në mesjavë. Me këtë barazim, kjo skuadër është 1 pikë larg Borusia Dortmund, plot 16 nga Bajerni që ecën më i qetë se kurrë drejt titullit kampion. (LajmeShqip.com)

Bundesliga

Java 21 / Rezultatet

Borusia Dortmund-Hamburg             1-4

17’ Levandovski / 18’, 62’ Rudnevs, 26’, 89’ Heung-Min Son

B. Mynshengladbah-B. Leverkusen  3-3

44’ Stranzl, 58’ De Jong, 86’ Herrman / 52’ Sam, 60’ Kisling, 64’ Shurle

Shtutgart-Verder Bremen                  1-4

50’ Traore / 34’, 74’ Ekiçi, 61’ Hunt, 90’ De Bryn

Hanover-Hofenhaim                           1-0

8’ Diuf

Grojter Fyrth-Volfsburg                      0-1

23’ Dost

Eintraht Frankfurt-Nyrenberg             0-0

Bajern Mynih-Shalke                          4-0

19’ (p), 51’ Alaba, 32’ Shvajnshtajger, 63’ Gomez