Java e 17-të e Serisë A ka dhuruar një tjetër arrati të Juventusit ndaj Interit, që cilësohet si kundërshtari kryesor në luftën për titull të bardhezinjve. Skuadra e Kontes ka mundur 3-0 Atalantën, duke qenë tashmë 7 pikë larg zikaltërve që u mundën një ditë më parë nga Lacio. 

Ndeshja e Juventusit ka qenë shumë thjeshtë, pasi është zgjidhur shpejt. Vuçiniç ka gjetur golin e avantazhit që në minutën e dytë dhe pa kaluar 15 minuta, rezultati ishte 2-0 për bardhezinjtë falë goditjes së dënimit të Pirlos. Sikur të mos mjaftonte kjo, goli i tretë i Markizio pa u mbushur gjysmë ore lojë dhe kartoni i kuq i Manfredini vetëm pak minuta më vonë, mbyllin praktikisht ndeshjen që në pjesën e parë duke i dhënë një fitore shumë më të lehtë sesa mendohej Juventusit, që priste më shumë rezistencë nga skuadra e cila në këtë kampionat ka mundur Milanin, Napolin dhe Interin.

Një fitore e thellë 4-1 ka qenë ajo e Milanit përballë Peskaras, por rezultati nuk pasqyron krejtësisht atë që kanë dhënë skuadrat në fushën e lojës. Ndonëse Milani kaloi në avantazh që në minutën e parë të sfidës me Noçerinon, për suksesin duhet të falënderojë vetë Peskarën, pasi autogolat e jashtëzakonshëm të Abruskato e Xhonatas në pjesën e dytë ishin ato që vendosën realisht fatin e kësaj ndeshje. Nuk mund të mungonte në minutat e fundit edhe goli i zakonshëm i El Sharauit, i cili kryeson i vetëm klasifikimin e golashënuesve më të mirë të kampionatit italian.

Rezultati surprizë i kësaj jave është humbja 1-0 e Romës përballë Kievos, një disfatë e cila ka ardhur vetëm dy ditë pasi trajneri i skuadrës kryeqytetase, Zdenek Zeman, deklaronte se skuadra e tij po luftonte për titullin kampion, ndonëse aktualisht e sheh veten 12 pikë larg Juventusit kryesues. (LajmeShqip.com)

Seria A

Java 17 / Rezultatet

Fiorentina-Siena            4-1

16’, 79’ Toni, 19’ (p) Pizarro, 45’ Akuilani / 70’ Rexhinaldo

Katania-Sampdoria       3-1

55’ Palialunga, 65’ Bergesio, 90’ Kastro / 29 (p) Mareska

Kievo-Roma                  1-0

87’ Pelisier

Xhenoa-Torino              1-1

29’ Grankvist / 19’ Bianki

Juventus-Atalanta         3-0

2’ Vuçiniç, 14’ Pirlo, 27’ Markizio

Milan-Peskara               4-1

1’ Noçerino, 51’ (ag) Abruskato, 79’ (ag) Xhonatas, 81’ El Sharaui / 56’ Terlici

Parma-Kaljari                4-1

22’, 86’ Belfodil, 55’ Biabiani, 65’ (p) Valdes / 20’ Sau

Napoli-Bolonja              2-3

50’ Gamberini, 70’ Kavani / 10’ Gabiadini, 86’ Kone, 89’ Portanova