Dani Pedrosa me Honda ka triumfuar në garën e fundit të sezonit të MotoGP në Valencia ku kampioni i ri i botës, Horge Lorenco, u rrëzua ndërsa kryesonte garën.

Gara do të kujtohet gjatë për kaosin që përfshiu pistën që para fillimit, kur motorët po bënin xhiron e nxemjes. Kur pjesa më e madhe e pilotëve filluan garën me goma për pistë të lagur, Lorenco vendosi të përdorë gomat e ndërmjetme, një lëvizje mëse e goditur e pilotit spanjoll.

Shumë pilotë kuptuan se duhej të ndërronin motor, duke zgjedhur atë për pistë të tharë dhe në vend që të shkonin në vijën e nisjes, shkuan direkt e në bokse, duke sjellë kaos dhe një nisje të përgjysmuar. Ata që vendosën të mbanin gomat për pistë të lagur, u detyruan të futeshin në bokse pas 2-3 xhirosh pasi pista u tha shumë shpejt.

Fillimisht Lorenco ndeshi në vështirësi, pasi gomat e tij vonuan të nxeheshin, por më pas arriti të ngjitej nga vendi i 11-të, deri në vendin e parë që e mbajti derisa u rrëzua, ndërsa po mundohej të linte një xhiro mbrapa Xhejms Elison. Pedrosa, që e ndiqte hap pas hapi, mori i pashqetësuar vendin e parë të garës dhe shkoi drejt finishit i vetëm.

Vendi i dytë i shkoi japonezit Nakasaga, i cili garoi në vend të Ben Spis dhe u tregua i aftë të përfitonte nga gabimi i Kal Kraçlou, i rrëzuar pak xhiro nga fundi. Vendi i tretë i shkoi Kejsi Stoner, që mbylli me një podium karrierën e tij në MotoGP, pasi i dha lamtumirën garave pas asaj të sotmes.

Kushtet e jashtëzakonshme të pistës bënë që renditja përfundimtare të revolucionarizohej dhe shumë motorë CRT të ngjiteshin mes vendeve të para, duke filluar nga Mikele Pirro me Gresini Honda që siguroi vendin e pestë.

Ndërkohë, Valentino Rosi mbylli pa sukses eksperiencën e tij me Dukati, duke marrë vetëm vendin e 10-të dhe duke qenë më shumë se 1 xhiro larg fituesit të garës. (LajmeShqip.com)