Silvestre Varela është emri që të gjithë portugezët do të falënderojnë sot pasi një gol i tij në minutën e 87-të të ndeshjes u ka dhënë fitoren 3-2 në një sfidë shumë të luftuar kundër Danimarkës. Ndërsa Portugalia po shkonte drejt eliminimit, goli i sulmuesit të Portos ka rihapur Grupin B, duke shlyer njëkohësisht edhe gabimet e njëpasnjëshme të Kristiano Ronaldos, një “fantazmë” zhgënjyese gjatë Euro 2012. 

Ndeshja ka filluar nën ritmin portugez, pasi ata kanë gjetur dy herë rrugën e rrjetës në pjesën e parë, me Pepe në minutën e 24-t pas një goditje këndi dhe me Helder Postigën që gjendet në zonë saktësisht nga Nani në minutën e 36-të.

Por Danimarka ngjallet dhe fillon të shohë nga sulmi, duke arritur të shkurtojë diferencën në minutën e 41-të me Bendtner, i cili shfrytëzon një përgjumje të mbrojtjes kundërshtare për të dërguar topin me kokë në portë. Me kalimin e minutave, është Danimarka që merr kontrollin e lojës, ndërsa Portugalia i beson vetëm kundërsulmit.

Nëse Kristiano Ronaldo humb raste të pabesueshme nga njëra anë e fushës, Bendtner nuk fal nga ana tjetër, duke shënuar përsëri me kokë në minutën e 80-të dhe duke çuar Portugalinë drejt eliminimit.

Por Varela, i aktivizuar në minutën e 84-t, ka bërë vetëm 3 minuta më vonë atë që kolegët e tij më të famshëm nuk arritën të bënin për shumë minuta me radhë, të mposhtë Andersen me një gjuajtje me të djathtën që shpëton Portugalinë dhe e kthen në garë për kualifikimin e mëtejshëm.

Falë këtij rezultati, Grupi B mbetet i hapur për të gjitha skuadrat, cilido qoftë përfundimi i sfidës mes Gjermanisë dhe Holandës. (LajmeShqip.com)

Grupi B

Holandë-Danimarkë     0-1

24’ Krohn Dehli

Gjermani-Portugali        1-0

73’ Mario Gomez

Danimarkë-Portugali     2-3

41’, 80’ Bendtner / 24’ Pepe, 36’ Postiga, 87’ Varela

Renditja

Gjermani          3          1-0

Danimarkë        3          3-3      

Portugali           3          3-3

Holandë           0          0-1

13.06.2012

Holandë-Gjermani        20:45

Gjyqtar: Jonas Erikson (Suedi)

Kharkiv (Ukrainë)

17.06.2012

Portugali-Holandë         20:45

Kharkiv (Ukrainë)

Danimarkë-Gjermani    20:45

Lviv (Ukrainë)