Goli i shënuar ndaj Portugalisë nuk ka shërbyer vetëm për t’i dhënë fitoren përfaqësueses gjermane, por edhe për t’i siguruar një fanellë titullari Mario Gomez në ndeshjet e ardhshme. Ndërsa Miroslav Klose po bëhej gati të hynte në fushë dhe të kthehej automatikisht në sulmuesin titullar të ndeshjeve të ardhshme të kombëtares gjermane, Gomez ka gjetur rrugën e rrjetës.

“Ka qenë një rrugë e gjatë, por jam i lumtur që trajneri kishte besim te unë. Kam qenë në gjendje të mirë që në ditën e parë të stërvitjes dhe jam i lumtur që arrita të shpërblej besimin e tij”.

“Ishte e qartë që Klose do të hynte në fushë në minutat e fundit. E dija që ky ishte shansi im i fundit dhe e shfrytëzova. Edhe kjo është pjesë e futbollit. Topi me sa duket u devijua dhe përfundoi direkt në kokën time, ndaj nuk ishte e vështirë të shënoja”, tregoi Gomez për mediat gjermane.

Edhe Lëv ka qenë i kënaqur që zgjedhja e tij ishte ajo e duhura, duke lënë Klosen në pankinë, ndonëse ky i fundit ka qenë gjithmonë një makinë golash për përfaqësuesen gjermane. “Gomez ka një cilësi ndryshe nga Klose dhe e tregoi, një rast, një gol”, tha trajneri gjerman, i cili është paksa i shqetësuar për ndeshjen e radhës kundër Holandës.

“Do të kisha preferuar një barazim të tyre me Danimarkën pasi tani është krijuar një situatë mjaft e veçantë për këtë kombëtare të fortë holandez. Ata kishin shumë raste, por në fund nuk shënuan dhe ndeshja e radhës për ta është për jetë a vdekje. Nëse nuk do të fitojnë ndeshjen e dytë, do të jetë shumë e vështirë për ta. Sigurisht që kjo e bën gjithçka më të vështirë edhe për ne, por edhe më entuziazmuese gjithashtu”, ishin fjalët e Joakim Lëv për “grupin e vdekjes”. (LajmeShqip.com) 

GRUPI B

09.06.2012

Holandë-Danimarkë     0-1

24’ Krohn Dehli

Gjermani-Portugali        1-0

73’ Mario Gomez

Renditja

Danimarkë     3         1-0      

Gjermani        3         1-0

Portugali         0        0-1

Holandë           0        0-1

13.06.2012

Danimarkë-Portugali     18:00

Lviv (Ukrainë)

Holandë-Gjermani        20:45

Kharkiv (Ukrainë)

17.06.2012

Portugali-Holandë         20:45

Kharkiv (Ukrainë)

Danimarkë-Gjermani    20:45

Lviv (Ukrainë)