Fitorja e jashtëzakonshme në minutat shtesë e Brisbein Roar ndaj Sidnei me protagonist absolut Besart Berishën, ka kaluar në plan të dytë për shkak të një zënke ku përsëri ishte protagonist sulmues shqiptar. Në disavantazh 0-1 deri në minutat shtesë, Brisbein gjeti golin e barazimit me anë të Adnan dhe më pas ishte sulmuesi shqiptar që në minutën e 95-të vulosi suksesin për ekipin e tij. Por në vend që t’i gëzohej golit të 10-të sezonal që e bën golashënuesin më të mirë të kampionatit australian, Berisha ka bërë një gjest që mund t’i shkaktojë shumë probleme në të ardhmen.

Ai hoqi fanellën e tij, duke ftuar mbrojtësin e Sidneit, Paskal Bosshart, të ziheshin në tunelin që të çonte në dhomat e zhveshjes. Vetëm ndërhyrja e bankinave respektive bëri që të qetësoheshin gjakrat dhe të evitohej një zënkë masive, por veprimi i Berishës është dënuar nga të gjithë, përfshirë trajnerin e tij.

“Kjo nuk është mënyra e duhur për të mbyllur gjërat. E di që Berisha është një person emocional. Emocioni dhe pasioni është ajo për të cilën kjo lojë ka nevojë, por normalisht ekziston një kufi. Këtë radhë, ai e kaloi kufirin. Pasi kjo çështje të harrohet do të ulem të flas me të”, tha trajneri Ange Postekoglu.

Meqenëse Federata Australiane e Futbollit ka hapur një hetim disiplinor rreth ngjarjes në fjalë, Berisha nuk ka dashur të bëjë shumë komente ndërsa ka lënë të nënkuptohet që mbrojtësi kundërshtar e kishte fyer më përpara.

“Isha i mërzitur dhe këtë e kuptuan të gjithë. Nuk dua të komentoj më shumë pasi çfarëdo që të them nuk do të sjellë ndonjë gjë të mirë në këtë moment. Nuk shqetësohem që komisionet disiplinore mund të më dënojnë mua pasi ata do ta shohin që ishte një ndeshje entuziazmuese ku lojtarët u lodhën dhe në fund nuk kishte asnjë zënkë. Shpresoj që ata të respektojnë faktin që në fund nuk ka ndodhur asgjë”, tha Berisha.

Sulmuesi shqiptar kishte 8 ndeshje pa shënuar gol dhe kjo ndeshje mund ta kthejë atë në ritmin e duhur. “Tani kam më shumë besim. Kur nuk shënon për 8 ndeshje radhazi, sigurisht që një sulmues ka nevojë për një gol”. (LajmeShqip.com)