Java e 18-të e kampionatit anglez ka filluar me fitoret e rëndësishme të Mançester Sitit dhe Arsenalit, me të parët që përpiqen të rihapin kampionatin në ndjekje të Mançester Junajtid dhe të dytët që luftojnë për t’u ringjitur fillimisht mes 4 më të mirëve, e pastaj edhe për të tentuar objektiva më prestigjiozë. 

Mançester Siti ka dominuar ndaj Riding, por e ka pasur shumë të vështirë të gjente rrugën e rrjetës, falë saktësisë në manovrat mbrojtëse të ekipit kundërshtar, por edhe pasaktësisë së vetë sulmuesve të kampionëve të Anglisë. Megjithatë, për të shpëtuar Mançinin nga një tjetër hap i gabuar në shtëpi ka menduar mesfushori Garet Berri, i cili në minutën e fundit të sfidës ka shënuar me kokë goli e fitores, duke çuar ekipin e tij vetëm 3 pikë pas Junajtid.

Shumë i shkëputur, 12 pikë larg kryesuesve të kampionatit, është Arsenali, që ka fituar 1-0 në fushën e Uigan. Megjithatë, kjo fitore ndihmon “topçinjtë” të ngjiten përkohësisht në vendin e tretë në renditje e të vazhdojnë progresin e tyre të ngadaltë. Ndeshja është zgjidhur nga një penallti e Arteta në pjesën e dytë, ndërsa duhet theksuar se trajneri i londinezëve ka preferuar përsëri Teo Uollkot si sulmues, duke lëshuar sinjale të qarta se është gati të plotësojë kushtet e anglezit për rinovimin e kontratës. (LajmeShqip.com)

Premier League

Java 18 / Rezultatet

Uigan-Arsenal                          0-1

60’ (p) Arteta

Mançester Siti-Riding               1-0

90’ Berri

Njukasëll-QPR                          1-0

81’ Shola Ameobi

Sauthempton-Sandërlend        0-1

42’ Fletçer

Totenhem-Stouk                       0-0

Uest Bromuiç-Noruiç                 2-1

44’ Gera, 82’ Lukaku / 23’ Snodgras

Uest Hem-Everton                    1-2

14’ Kol / 64’ Aniçebe, 73’ Pienar

Liverpul-Fullhem                       4-0

8’ Skrtel, 36’ Xherard, 52’ Dauning, 90’ Suarez