Java e 15-të e kampionatit anglez ka dhuruar shkëputjen e radhës së Mançester Junajtid, që ka përfituar nga hapi i gabuar i rivalëve të Sitit për të rritur në 3 pikë diferencën ndaj tyre. 

Skuadra e Aleks Ferguson ka fituar 4-3 në fushën e Riding, pas një ndeshje argëtuese që ka dhuruar një pjesë të parë ku në më pak se 35 minuta janë shënuar të 7 golat e sfidës. Uejn Runi duket se ka dëgjuar këshillën e trajnerit të tij për të shënuar më shumë gola, ndërsa ka gjetur dy herë rrugën e rrjetës në këtë sfidë, ku shënoi edhe i zakonshmi Van Persi.

Tani diferenca me Mançester Sitin ka shkuar në 3 pikë, pasi rivalët kryesorë të Junajtid janë ndalur në shtëpi në barazimin 1-1 me Evertonin. Karlos Tevez siguroi këtë pikë të rëndësishme falë një penalltie në minutën e 43-të, ndërsa më parë miqtë kishin kaluar në avantazh me Fellainin.

Java e 15-të ka konfirmuar krizën e dukshme të skuadrave londineze. Me Çelsin dhe Arsenalin që kanë regjistruar humbjet e radhës. Emërimi i Benitez në pankinën e bluve nuk ka ndërruar fatet e kësaj skuadre,q ë është mundur nga Uest Hem pa shfaqur asgjë nga loja e saj dhe duke mbetur tashmë plot 10 pikë larg Mançester Junajtid, ndërsa vetëm pak javë më parë kryesonin të shkëputur kampionatin . Ndërsa Arsenali është mundur në shtëpi nga Suonsi, ku Miçu ka ndëshkuar “topçinjtë” me dy golat e tij në minutat e fundit të ndeshjes. Tifozët e Arsenalit kanë shpërthyer në protesta ndaj ndeshjes, duke kërkuar në kor largimin shefit të klubit, Ivan Gazidis, të cilin e shohin si shkaktar të problemeve të skuadrës për shkak të politikës së mosblerjes së lojtarëve për të kursyer më shumë para. (LajmeShqip.com)

Premier League

Java 15 / Rezultatet

Uest Hem-Çelsi                      3-1

63’ Kol, 86’ Diame, 90’ Maiga / 13’ Mata

Arsenal-Suonsi                       0-2

88’, 90’ Miçu

Fullhem-Totenhem                  0-3

56’ Sandro, 72’, 77’ Defo

Liverpul-Sauthempton             1-0

43’ Ager

Mançester Siti-Everton             1-1

43’ (p) Tevez / 33’ Fellaini

QPR-Aston Vila                         1-1

18’ Maki / 8’ Holman

Uest Bromuiç-Stouk                   0-1

75’ Uajthed

Riding-Mançester Junajtid         3-4

8’ Robson-Kanu, 19’ Le Fondre, 23’ Morrison / 13’ Anderson, 16’ (p), 30’ Runi, 34’ Van Persi