Diego Maradona thotë se Gjermania është favorite për të fituar Euro 2012 para Spanjës, pasi këta të fundit do të ndjejnë shumë mungesën e Vija dhe Pujol.

Skuadra e Joakim Lëv u mund në finalen e katër viteve më parë nga iberikët në Austri, por Maradona beson se ka ardhur koha që ata të ngjiten në shkallën më të lartë të podiumit,ndonëse për momentin janë në ”grupin e vdekjes” ku renditen përkrah Holandës, Portugalisë dhe Danimarkës.

“Gjermania, ekipi im favorit për të fituar turneun, ka fituar çdo ndeshje të kualifikueseve me Klose, Myler dhe Podolski përpara, të mbështetur nga Ozil dhe Kedira”, shkroi argjentinasi për gazetën “The Times of India”. “Shvajshtajger dhe shokët e tij duhet të kualifikohen pa probleme në fazën e eliminimit direkt. Lëv i njeh mirë lojtarët e tij dhe mbrojtja e udhëhequr nga Lahm, Badshtuber dhe Nojer do të pësojë pak gola”, tha trajneri që dy vite më parë në drejtimin e Argjentinës u eliminua nga Botërori pikërisht nga kombëtarja gjermane.

Por Maradona është i bindur se edhe Spanja do ta ketë të lehtë të kalojë në fazën e eliminimit direkt ndonëse ka një grup relativisht të komplikuar ku gjendet edhe Italia.

“Del Boske ka në dispozicion kampionë si Kazijas, Ramos, Pike, Buskets, Ksavi, Silva, Iniesta e Lorente për ta fituar lehtësisht këtë grup. Spanja është favorite por nuk është më e fortë si dy vite më përpara, pasi ka humbur lojtarë të rëndësishëm si Pujol e Vija”.

“Favoritë për të kaluar me ta janë italianët, të cilët po vuajnë për të gjetur identitetin e tyre, ndonëse udhëhiqen në mesfushë nga Pirlo dhe në sulm nga dyshja Kasano-Baloteli. Italia do të luajë lojën tipike në kundërsulm, ndërsa e kam të vështirë të shoh Irlandën e Trapatonit të kalojë në fazën tjetër, gjithmonë nëse nuk i ndjek fati i tyre i famshëm irlandez”, tha trajneri aktual i Al Uasl. (LajmeShqip.com)