Tito Vilanova u ka thurur elozhe të gjithë lojtarëve të tij, duke bërë të qartë se suksesi 3-1 ndaj Saragozës ka qenë meritë e lojës së skuadrës e cila nuk është e varur nga paraqitjet e Lionel Mesit, ndonëse ylli argjentinas shënoi dy gola në këtë ndeshje.

Trajneri i ekipit katalanas ka menduar më shumë të flasë për skuadrën, që e ka përgëzuar për mënyrën si luajti edhe pse pjesa më e madhe e lojtarëve kishin qenë të impenjuar me kombëtaret në mesjavë.

“Ekipi ka punuar shumë sot, i kuptoj lodhjet për ndeshjet me kombëtaren. Leo ishte vendimtar dhe skuadrat e mëdha kanë gjithmonë lojtarë të mëdhenj, por ai nuk i fiton i vetëm ndeshjet”.

Por pavarësisht asaj që deklaroi Vilanova, të gjithë vazhdojnë të shohin me kureshtje mrekullitë para porte të argjentinasit i cili i afrohet gjithnjë e më shumë rekordit 40 vjeçar të Gerd Myler i cili në vitin 1972 shënoi 85 gola në një vit kalendarik.

Mesit i mungojnë vetëm 7 gola për të arritur legjendën gjermane, ndërsa vazhdon të bëjë hapa para edhe në renditjen e të gjitha kohëve të kampionatit spanjoll, pasi tashmë mban vendin e 9-të në këtë klasifikim me 186 gola, duke kaluar një legjendë si Santilana

Për më tepër, duket i çuditshëm fakti që Mesi nuk arrin të shënojë vetëm një gol në ndeshje të kampionatit në këtë sezon. 17 golat që ka shënuar ai në këtë edicion janë të ndarë në 7 dygolësha dhe 1 tregolësh. (LajmeShqip.com)