Përfaqësuesit e Viktor Valdes kanë bërë të ditur se portieri ka lajmëruar Barcelonën se nuk do të rinovojë kontratën e tij dhe do të largohet në fund të sezonit të ardhshëm, me përfundimin e saj.

Drejtuesit e klubit shpresonin që portieri 31 vjeçar të vazhdonte bashkëpunimin e tij me Barcelonën deri në fund të karrierës, duke qenë një nga elementët që ka dalë pikërisht nga akademia e famshme katalanase dhe ata zhvilluan një takim me përfaqësuesit e tij. Por rezultati ishte negativ, siç u pasqyrua në deklaratën e publikuar në darkën e të enjtes.

“Përfaqësuesit e Viktor Valdes i kanë treguar Barcelonës për vendimin e pakthyeshëm të lojtarit për të mos rinovuar kontratën e tij, duke eliminuar mundësinë e negociatave të mëtejshme për rritjen e rrogës”, thanë përfaqësuesit e tij për agjencinë e lajmeve spanjolle “EFE”.

Kontrata e Valdes përfundon në vitin 2014, por mendohet se ai do t’i bashkohet një kampionati tjetër ndoshta që në fund të këtij sezoni pasi dëshiron “të përjetojë kultura të tjera”. Një vendim i tillë bie në kundërshtim me atë që lojtari tha në një intervistë në fillimin e janarit, ku shprehu dëshirën të mbyllte karrierën te Barcelona.

Emri më i mundshëm që qarkullon rreth zëvendësuesit të tij është ai i David De Gea, portierit spanjoll të Mançester Junajtid, i cili nuk ka arritur të afirmohet në Angli. (LajmeShqip.com)