Robin Van Persi mund të jetë pranë largimit nga Arsenali pasi ka refuzuar rinovimin e kontratës me “topçinjtë”. Në një deklaratë të publikuar në faqen e tij personale në internet, sulmuesi holandez ka zbuluar se nuk ka hedhur firmën në një kontratë të re ndonëse akordi me Arsenalin përfundon në fundin e sezonit të ardhshëm.

“Siç kishim lajmëruar më parë gjatë vitit, kam patur një takim me trajnerin dhe drejtuesit e klubit menjëherë pas përfundimit të sezonit. Kjo ishte një mbledhje për strategjitë e klubit dhe politikat e tyre. Termat financiarë apo një kontratë nuk është diskutuar mes palëve pasi ky nuk është prioriteti im”.

“Unë personalisht kam patur një sezon të shkëlqyer por objektivi im ishte të fitoja trofe dhe të ktheja klubin në ditët e tij të lavdishme. Për shkak të respektit të jashtëzakonshëm për z. Venger, lojtarët dhe tifozët, nuk do të hyj në detaje, por fatkeqësisht gjatë këtij takimi unë u qartësova se në shumë aspekte, jam në kundërshtim me mënyrën se si Arsenali mendon të ecë përpara”.

“Jam menduar shumë dhe kam vendosur të mos rinovoj kontratën. Ju keni të drejtë të kundërshtoni vendimin tim, por e bëj të qartë që e dua këtë klub pavarësisht asaj që do të ndodhë. Sapo z. Gazidis të kthehet nga pushimet, do të zhvillojmë takime të tjera dhe do ju tregoj se çfarë ndodh”, ishte deklarata e bërë nga Van Persi që ka tronditur ambientin te Arsenali.

Për lojtarin ka interesim nga Mançester Siti, Juventus por edhe Barcelona e Real Madrid që shumë shpejt do të bëjnë oferta zyrtare për të. Holandezi është futbollisti i radhës që largohet nga “topçinjtë” me qëllimin për të fituar trofe, duke ndjekur emra të tillë si Henri, Fabregas, Nasri apo Klishi. (LajmeShqip.com)