Bredli Uigins ka arritur t’i rezistojë sulmeve të rivalëve dhe të mbrojë fanellën e verdhë të liderit të Turit të Francës, gjatë etapës së 10-të të garës që tashmë po kalon përmes Alpeve.

Etapa prej 194.5 kilometrash i shkoi francezit Tomas Vokler, i cili dominoi të tre ngjitjet e kësaj etape, përfshirë edhe atë shumë lodhëse të Kolombier 43 kilometra nga finishi, por që këtë edicion nuk solli ndryshime të mëdha në renditjen e përgjithshme, ndonëse është një ngjitje jashtë kategorie.

Belgu Jurgen Van Den Bruk sulmoi tre herë gjatë kësaj ngjitje, por në të tre rastet u arrit nga skuadra e Uigins, “Sky”. Ndërsa Vinçenco Nibali sulmoi gjatë zbritjes, duke arritur deri në 1 minutë diferencë nga Uigins, për t’u arritur më pas nga grupi i pretendentëve kur mbeteshin edhe 21 kilometra nga përfundimi i etapës.

Vokler e meritoi plotësisht fitoren e tretë në Turin e Francës gjatë karrierës së tij, ndërsa arrti të kalonte në finish italianin Mikele Skarponi dhe gjermanin Jens Voigt. (LajmeShqip.com)

Renditja e Turit të Francës pas etapës së 10-të

1. Bredli Uigins                      43 orë 59’02”  

2. Kadel Evans                        +1’53”

3. Kristofer From                  +2’07”

4. Vinçenco Nibali                +2’23”

5. Denis Mençov                     +3’02”

6. Haimar Zubelda                 +3’19”

7. Maksim Monfort               +4’23”

8. Jurgen Van Den Bruk      +4’48”

9. Nikolas Roshe                    +5’29”

10. Tixhei Van Garderen    +5’31”