Tifozët e Mançester Junajtid kanë filluar të ëndërrojnë se në sezonin e ardhshëm do të ketë përsëri si idhullin tyre portugezin Kristiano Ronaldo. Iniciativa “Bring Ronaldo Home” (Të kthejmë Ronaldon në shtëpi), ka si qëllim që të gjithë tifozët e skuadrës të mbledhin para nëpërmjet internetit për të bërë realitet ëndrrën e kthimit të lojtarit në “Old Traford”.

Sipas përllogaritjeve të bëra, janë mbi 10 milion tifozë të Mançester Junajtid në botë, të cilët do të ishin të gatshëm të paguanin për të parë përsëri lojtarin me fanellën e “djajve të kuq”. Nëpërmjet një transferte bankare të veçantë, këto tifozë do të depozitojnë paraprakisht nga 10 paund në një llogari të veçantë, të krijuar për të blerë futbollistin nga vetë tifozët.

Ky cilësohet si “parapagim” për blerjen e fanellës së ardhshme të portugezit, gjithmonë nëse ai kthehet në radhët e skuadrës angleze. Paratë e mbledhura do të shkojnë për klubin, ndërsa tifozët që kanë bërë pagesën e parë prej 10 paund, do të paguajnë edhe 52 paund të tjera për të marrë fanellën e idhullit të tyre.

Nëse transferimi nuk realizohet, banka ku ekziston kjo llogari e veçantë, ka marrë përsipër të kthejë çdo paund të paguar në adresat e atyre që kanë kontribuar në këtë llogari të veçantë.

Ideatorët mendojnë se në këtë mënyrë do të sigurojnë brenda pak javësh të ardhurat e mjaftueshme për të bërë shifrën 100 milion paund që mendohet se është vlera e kartonit të portugezit. Përballë një mobilizimi të tillë të tifozëve, duket se edhe sheikët e PSZH do ta kenë të vështirë në ankandin për të siguruar futbollistin. (LajmeShqip.com)