Roberto Mançini do të përballet me shumë mundësi me një sanksion të UEFA-s pasi në përfundimin e ndeshjes mes Mançester Sitit dhe Ajaksit, hyri në fushë duke protestuar ashpër ndaj gjyqtarit Peter Rasmusen. Trajneri italian ishte i inatosur pasi skuadrës së tij iu anulua një gol i shënuar nga Aguero, si dhe nuk iu akordua një penallti për faull ndaj Balotelit, ndërsa takimi përfundoi 2-2 duke bërë thuajse inekzistente shanset e kësaj skuadre për të kaluar turin.

“I thashë gjyqtarit që ishte gol. Nuk e pashë penalltinë, por i thashë që goli i Aguero ishte i  rregullt. Nuk e pashë në fushë situatën me Marion por edhe ajo ishte penallti. Ne shënuam tre gola sot, por gjyqtari dhe stafi i tij ishin me të vërtetë të dobët. Unë i thashë vetëm ‘Urime!’”, deklaroi trajneri italian duke mohuar zërat se ai ka fyer gjyqtarin.

Mançini akuzohet se ka bërë gjestin e prerjes së fytit ndaj kameramanit që po filmonte në ato momente, por trajneri italian tha se ajo ishte thjesht një shenjë që ky i fundit të mos filmonte më pasi ndeshja kishte mbaruar.

“Kameramani dëshironte të filmonte, ndaj po më ndiqte nëpër fushë. Nuk i thashë se ishte një person i mbaruar dhe nuk e kërcënova. I thashë “Mbylle, mbylle, ik”. Ajo që po i thosha ishte rreth ndeshjes, jo rreth meje”, tha trajneri i cili pritet që të marrë një masë ndëshkimore nga UEFA për të dy incidentet, ndërsa me shumë mundësi do të shohë nga tribuna dy takimet e fundit në grup ndaj Real Madrid dhe Borusia Dortmund.

Vetë tekniku italian është i bindur se nëse ndodh mrekullia dhe skuadra e tij kalon grupin, atëherë Mançester Siti do të gjejë forcën për të fituar këtë turne.

“Nëse ne e mbyllim grupin me 8 pikë dhe kualifikohemi, atëherë ju them se do ta fitojmë Ligën e Kampioneve. Do të thotë se jemi të destinuar për një gjë të tillë. Unë besoj te skuadra ime, por do të jetë shumë e vështirë”, përfundoi ai. (LajmeShqip.com)