Trajneri i Brazilit, Luiz Felipe Skolari, ka dalë në mbrojtje të Neimar duke kundërshtuar të gjithë ata që e cilësojnë futbollistin një simulues që rrëzohet në kontaktin më të vogël ndaj tij.

“Ai pëson faulle 10 herë në çdo ndeshje dhe mundësisht një apo dy prej tyre nuk duhet të jepen, por kjo është normale në futboll. Trajnerët që kritikojnë Neimar, që pretendojnë se ai rrëzohet me dashje apo simulon, e bëjnë një gjë të tillë sepse është shumë e thjeshtë për ta. Në Brazil duket se kur je shumë i mirë, kur ka lojtarë që improvizojnë apo krijojnë gjëra, ekziston një ndjenjë e keqe ndaj tyre”, tha Skolari.

“Në kombëtare, Neimar do të ketë lirinë e plotë të driblojë, të improvizojë dhe të shfrytëzojë krijimtarinë e tij. Por nuk mund të krijosh një skuadër vetëm me improvizim, duhet të kesh një grup”, tha trajneri i Brazilit që më pas publikoi listën e lojtarëve të grumbulluar për miqësoret e fundit të marsit kundër Italisë dhe Rusisë.

Trajneri ka përfshirë në listë mesfushorin e Real Madrid, Rikardo Kaka, i cili ka filluar të sigurojë disa minuta më shumë me ekipin spanjoll, ndërsa ka lënë jashtë Ronaldinjon që zhgënjeu në ndeshjen kundër Anglisë si dhe nuk është shfaqur ende në formën e tij më të mirë në kampionatin brazilian në këtë sezon. (LajmeShqip.com)

Lista e kombëtares braziliane për miqësoret me Italinë dhe Rusinë:

Portierë: Diego Kavalieri (Fluminense), Hulio Cesar (QPR).

Mbrojtës: Dani Alvesh (Barcelona), Dante (Bajern Mynih), David Luiz (Çelsi), Dede (Vasko Da Gama), Filipe Luis (Atletiko Madrid), Marcelo (Real Madrid), Tiago Silva (PSZH).

Mesfushorë: Fernando (Gremio), Hernanes (Lacio), Zhean (Fluminense), Kaka (Real Madrid), Lukas (PSZH), Luiz Gustavo (Bajern Mynih), Oskar (Çelsi), Paulinjo (Korinthians), Ramires (Çelsi).

Sulmues: Diego Kosta (Atletiko Madrid), Fred (Fluminense), Hulk (Zenit), Neimar (Santos)