Viktoriano Arminio, presidenti i Komitetit Teknik të Gjyqtarëve të kampionatit spanjoll, ka bërë të ditur se do të kërkojë zyrtarisht nga Federata Spanjolle ndëshkimin e mbrojtësit të Barcelonës, Xherard Pike. Ky i fundit, pas ndëshkimit me karton të kuq në sfidën kundër Gijon, shpërtheu në akuza kundër gjyqtarit të ndeshjes, Karlos Velasko Karbajo.

Sipas futbollistit, ndëshkimi me karton të kuq kishte qenë i paramenduar pasi ai kishte debatuar më parë me gjyqtarin në dhomat e zhveshjeve.

“Komentet e Pike janë shumë serioze. Ata të bëjnë të nxehesh pasi njerëzit e sportit duhet të respektojnë njëri-tjetrin. Komentet e tij ndikojnë direkt në gjykimin e ndeshjeve ndaj ne do të kërkojmë dënimin e tij”, tha Arminio për “Radio Nacional”.

Barcelona ka detyruar lojtarët dhe pjesëtarët e stafit që të mos komentojnë më për gjyqtarët, por zëdhënësi për shtyp i skuadrës, Toni Freiksa, nuk i ka rezistuar tundimit për të komentua ngjarjen në Twitter. “Çfarë skandali! Punë e shkëlqyer e këtyre profesionistëve të mëdhenj”, ishin fjalët e tij.

Në sezonet e fundit, si Pep Guardiola, ashtu edhe Zhoze Murinjo, janë ndëshkuar me një gjobë prej 1500 eurosh për shkak të komenteve të bëra kundër nivelit të gjyqtarëve në kampionatin spanjoll. (LajmeShqip.com)