Çfarë mund të bëjë një ekip futbolli në 47 sekonda? Përgjigja është e thjeshtë: të shënojë dhe të mundë Barcelonën! Kjo është ajo që ka bërë Sëlltiku në natën e të mërkurës, përballë katalanasve në ndeshjen e luajtur në stadiumin e vet.

Sipas të dhënave zyrtare nga UEFA, Sëlltiku mbajti topin në kontroll vetëm 47 sekonda gjatë pjesës së dytë të lojës (llogaritet vetëm koha kur topi nuk është i ndalur apo jashtë kufijve të fushës). Por këto 47 sekonda i mjaftuan skuadrës së drejtuar nga Lenon që të shënonte një gol me anë të Uat, duke mbajtur vetëm 3% të topit në këtë pjesë loje. Në pjesën tjetër të kohës efektive, 25 minuta e 25 sekonda, ishte gjithmonë një futbollist i Barcelonës që zotëronte topin.

Loja me zotërim e Barcelonës ka arritur kulmin e saj në Gllasgou, pasi katalanasit gjatë të gjithë takimit mbajtën topin në 89% të kohës efektive, ndërsa në pjesën e dytë arritën deri në 97%, duke regjistruar një rekord absolut për aktivitetin në fjalë.

Por kjo mbajtje topi nuk e ndihmoi aspak ekipin e drejtuar nga Tito Vilanova të fitonte përballë murit të ndërtuar nga Lenon para portës së Forster, të cilin Mesi e mundi vetëm në minutat shtesë, atëherë kur ishte shumë vonë për të tentuar një përmbysje po aq historike sa efektiviteti i 47 sekondave të Sëlltikut. (LajmeShqip.com)