Shumë lojtarë të Juves po nxirren në shitje. Marotta duhet të spastrojë një organikë tepër të ngjeshur. Me këto largime sillen para shtesë, të cilat do të investohen më pas në merkato. Me ardhjen e Pazienzas, bëhen plot 30 juventinë në skuadër. Këta janë tepër, duke pasur parasysh se Juventusi nuk do të luajë në Evropë. Gjithsej do të luhen 38 ndeshje në kampionat dhe 5 në Kupë të Italisë. Në vitrinë është nxjerrë një skuadër e tërë.
Storari i pëlqen Lazios dhe mund të përfshihet në marrëveshjen Lichtsteiner. Manninger kërkohet në Gjermani. Motta pëlqehet nga Parma dhe Lazio. Për Grygeran që ka akoma 1 vit kontratë prej 1.6 milionë euro, janë vënë në ndjekje turqit e Bursaspor. Sorensen do të shkojë për të fituar eksperiencë, diku në huazim. Grosso pëlqehet në Dubai.
Në mesfushë, Martinez pëlqehet nga Forentina, ku trajneri Mihajloviq kërkon ta rikthejë atë në nivelet që ishte kur e stërviste tek Catania. Aquilani është akoma paqartësi. Salihamidziq është në skadencë kontratë. Melo dhe Sissoko do të largohen në Angli ose Spanjë kurse Giandonato është pranë Udineses.
Në sulm Amauri dhe Iaquinta, të cilët së bashku përfitojnë rreth 8 milionë euro, pritet të hyjnë në planet e Romës.