Trajneri i Reinxhërs Glasgou, Elli MekKoist, ka falënderuar publikisht tifozët e skuadrës së tij, pasi 49118 vetë ndoqën ndeshjen e luajtur në stadiumin “Ibroks” ndaj Stërling, të përfunduar me fitoren 5-1 të skuadrës që falimentoi këtë vit dhe është e detyruar të luajë në kategorinë e katërt në Skoci.

“Gjithçka ishte e pabesueshme. Pashë nga dritarja e zyrës time në orën 13:30 dhe gjithë rruga para stadiumit ishte e mbushur. Ishte fantastike, një mesazh i qartë inkurajimi për klubin dhe vështirësitë e tij. Kur merr një mbështetje të tillë nga tifozët, ka vetëm një rrugë për të ndjekur, të ecësh përpara”, tha ai.

Kjo ishte ndeshja e parë në fushën e vet për Reinxhërs që në momentin kur ranë në kategorinë e katërt pas falimentimit. Skocezët thyen rekordin e mëparshëm botëror të kësaj kategorie që mbahej nga një tjetër skuadër britanike, anglezët e Kristal Palas.

Rekordi i kategorisë së katërt mbahej nga ky ekipi anglez që në vitin 1961, kur 37774 tifozë të kësaj skuadre ndoqën takimin ndaj rivalëve londinezë të Milluoll. (LajmeShqip.com)