Java e 13-të e Kategorisë Superiore, e fundit e fazës së parë dhe vitit 2011, ka dekretuar Teutën si “kampione dimri”.

Ekipi durrsak, ndonëse nuk ka shkuar më shumë se një barazim 1-1 ndaj Kastriotit, ka mbetur i shkëputur i vetëm në kreun renditjes.

Pepa ka kaluar në avantazh skuadrën e drejtuar nga Hasan Lika, por miqtë nuk janë dorëzuar dhe kanë barazuar rezultatin falë golit të Turdiut në minutën e 68-të. Kësisoj, Teuta mbetet e shkëputur 5 pikë nga Tirana, që nuk ka mundur të afrohet duke barazuar edhe ajo 0-0 në fushën e Kamzës. Bardheblutë kanë dominuar takimin por ndërhyrjet e portierit Bytyçi kanë shpëtuar portën ndërsa një goditje dënimi e Duros ëstë ndalur nga traversa.

Në barazim pa gola ka përfunduar edhe sfida mes Laçit dhe Flamurtarit, e luajtur në stadiumin “Loro Boriçi” të qytetit të Shkodrës pa praninë e tifozëve, për shkak të dënimit të dhënë nga Komisioni i Disiplinës për ekipin kurbinas. Megjithatë, kjo nuk e ka ndihmuar skuadrën vlonjate të marrë tre pikët për t’iu afruar më shumë kreut të renditjes.

Një fitore e rëndësishme ka qenë ajo 2-1 e Shkumbini ndaj Vllaznisë në Peqin. Dygolëshi i të zakonshmit Dervishi ka larguar peqinasit nga zona e ftohtë e renditjes duke kaluar pikërisht Vllazinë, e cila pret rifillimin e merkatos për t’u përforcuar pas largimit të disa prej futbollistëve të saj.

Edhe Tomori ka hedhur një hap të sigurt drejt largimit nga zona e ftohtë renditjes, duke mundur 2-0 Apoloninë dhe fundosur më thellë skuadrën fierake. Golat e Bakiut dhe Shametit kanë bërë që tashmë skuadra beratase të arrijë në kuotën e 11 pikëve dhe të jetë në distancë më të afërt me skuadrat që janë larg zonës së ftohtë të renditjes.

Ndërkohë, rezultati më i papritur i javës ka qenë barazimi 1-1 i Dinamos me Bylisin. Ballshiotët vinin në kryeqytet me pretendime dhe dominuan me meritë gjatë të gjithë takimit duke gjetur edhe golin me anë të Dimos që në pjesën e parë. Por në minutat shtesë të takimit, pas një 11-metërshi të akorduar nga gjyqtari Dobi, portieri i bluve Osmani ka shënuar golin e barazimit. Për Dinamon, rezultati i kësaj ndeshje bën që më në fund të ketë një pikë në renditjen e kampionatit.

Ndeshja Skënderbeu-Pogradeci është shtyrë në një datë për tu përcaktuar, për shkak të reshjeve të shumta të dëborës që mbuluan qytetin e Korçës në ditët e fundit. Kategoria Superiore do të kthehet me 11 shkurt 2012 me ndeshjet e javës së14-të.

Kategoria Superiore

Rezultatet

Tomori-Apolonia          2-0

Dinamo-Bylis                1-1

Shkumbini-Vllaznia       2-1

Laçi-Flamurtari 0-0

Kamza-Tirana              0-0

Teuta-Kastrioti 1-1

Skënderbeu-Pogradeci e shtyrë

Renditja

Teuta 32, Tirana 27, Skënderbeu 23, Kastrioti 23, Flamurtari 22, Bylis 18, Shkumbini 18, Vllaznia 17, Kamza 14, Pogradeci 13, Laçi 11, Tomori 11, Apolonia 8, Dinamo 1.