Oklahoma ka treguar se një finale e mundshme mes tyre dhe Çikagos, pa praninë e Derrik Rouz në fushë nuk ka asnjë kuptim dhe asnjë rivalitet. Kryesuesit e Konferencës së Perëndimit kanë fituar 92-78 sfidën ndaj kryesuesve të Konferencës së Lindjes, te cilëve u mungonte pikërisht Derrik Rouz për ndeshjen e 10-të radhazi. Por suksesi i vendasve do të kishte qenë shumë më i thellë nëse trajneri i Oklahomas nuk do të kishte vendosur të linte pushim në të gjithë periodën e katërt titullarët, duke u dhënë më shumë hapësirë zëvendësuesve. Kevin Durant shënoi 26 pikë e 10 topa në tabelë në vetëm 3 pjesë loje, i ndjekur nga Rasëll Uestbruk me 27 pikë e 5 pasime në po aq minuta në fushë. 

Edhe skuadra e dytë në renditjen e Konferencës së Lindjes, Majemi, nuk ka arritur të përfitojë, pasi është turpëruar në fushën e Boston me rezultatin 91-72. Edhe në këtë rast, ndeshja është vendosur që në periodën e tretë dhe titullarët e Boston i kanë bërë pushim minutat e fundit të periodës së katërt pasi kishin krijuar një avantazh aq të ndjeshëm sa ishte e pamundur për Majemin t’i arrinte. Razhon Rondo udhëhoqi skuadrën e tij me një paraqitje të jashtëzakonshme duke regjistruar 16 pikë, 11 topa në tabelë dhe 14 pasime, ndërsa të gjithë titullarët e Boston e përfunduan ndeshjen me 10 apo më shumë pikë. (LajmeShqip.com)

Rezultatet

Çikago-Oklahoma          78-92

Majemi-Boston               72-91

Denver-Orlando            104-101

Uashington-Toronto      92-99

Indiana-Hjuston             104-102

Minesota-Portland         106-119

Nju Orlins-Feniks           75-92

G. Steit-LA Leikërs       112-120