Ndeshja mes Mançester Sitit dhe Real Madrid të mërkurën, do të jetë jubilare për Zhoze Murinjon, i cili do të bëhet trajneri me moshën më të re që arrin të zhvillojë 100 ndeshje në Ligën e Kampioneve.

Portugezi bëhet trajneri i pestë që e arrin këtë shifër, por ndryshe nga Karlo Ançeloti, Arsen Venger, Otmar Hitzfeld dhe Aleks Ferguson, Murinjo do të jetë i vetmi që figuron nën moshën 49 vjeç kur mbërrin këtë etapë të rëndësishme të karrierës.

Ançeloti e arriti këtë pikë në moshën 51 vjeçare, Venger dhe Hitzfeld kur ishin 58 vjeç dhe Ferguson në moshën 62 vjeç. Murinjo thyen rekordin e mëparshëm me rreth 2 vite diferencë, ndërsa është i vetmi që e ka arritur këtë shifër me kaq ekipe të ndryshme, pasi ka luajtur në Ligën e Kampioneve me Porton, Çelsin, Interin dhe Real Madrid.

Debutimi i Murinjos në këtë aktivitet ka qenë në 19 shkurt 2002 pikërisht në “Santiago Bernabeu” me Porton kundër Real Madrid, ndërsa që në atë moment, bilanci i tij është prej 54 fitoresh, 25 barazimesh dhe 20 humbjesh, me 166 gola të shënuar dhe 85 të pësuar.

Mesatarja e tij më e mirë ka qenë në sezonin  kaluar, atë 2011-2012, edhe pse nuk arriti të fitonte turneun, duke u eliminuar në gjysmëfinale nga Bajern Mynih. Real Madrid, nën drejtimin e tij, regjistroi fazën më të mirë në grupe në historinë e aktivitetit, ndërsa në total fitoi 10 ndeshje, barazoi 1 dhe humbi 1. Kjo skuadër shënoi 35 gola, me një mesatare të lartë prej 2.9 golash për takim.

Gjatë 10 viteve në këtë aktivitet, ai është përballur me 33 skuadra të ndryshme, ku ironikisht, Barcelona ka qenë kundërshtari më i shpeshtë me 12 ndeshje, ndërsa pas katalanasve vijnë Liverpul, Olimpik Lion dhe CSKA Moskë me 6 ndeshje secila. (LajmeShqip.com)