Horge Lorenco me Jamaha duket se ka vënë diktatin e tij në këtë sezon të MotoGP duke arritur të fitojë në Çmimin e Madh të Italisë në pistën e Muxhelos. Ish-kampioni i botës kaloi Dani Pedrozan e Hondas që në kthesën e parë dhe nga ai moment nuk kishte më nevojë as të shihte prapa pasi kundërshtarët nuk e mbanin dot ritmin e tij.

Piloti spanjoll vendosi një distancë sigurie prej 5 sekondash nga Pedroza që përfundoi garën i dyti, ndërsa në fundin e garës kishte kohë edhe të ulte shpejtësinë dhe t’i bënte me dorë publikut të pranishëm, para se të prente finishin dhe të merrte fitoren e tij të 5-të në këtë sezon.

Nëse Pedroza arriti të siguronte vendin e dytë në podium dhe të bëhej rivali kryesor për titull i Lorencos, gjërat po shkojnë si mos më keq për Kejsi Stoner që vazhdon të lërë pikë rrugës. Kampioni në fuqi u rrëzua në xhiron e 10-të dhe vetëm në metrat e fundit të garës arriti të marrë vendin e 8-të në këtë pistë.

Vendi i tretë i shkoi italianit Andrea Doviciozo, i cili mundi në finish gjermanin Stefan Bradl, me Valentino Rosin që siguroi vendin e pestë, duke treguar shenjat e një Dukati në rritje, të paktën të aftë për të qëndruar në luftë për vendet 4-5. (LajmeShqip.com)

Renditja e botërorit MotoGP

185      Horge Lorenco (Jamaha)

166      Dani Pedroza (Honda)

148      Kejsi Stoner (Honda)

108      Andrea Doviciozo (Tek 3 Jamaha)

95        Kal Kraçlou (Tek 3 Jamaha)

82        Valentino Rosi (Dukati)

75        Stefan Bradl (LCR Honda)

74        Niki Hejden (Dukati)

73        Alvaro Bautista (Gresini Honda)

66        Ben Spis (Jamaha)

60        Hektor Barbera (Pramak Dukati)