Kejsi Stoner ka arritur të marrë një pole-position të jashtëzakonshme para shokut të tij të skuadrës te Honda, Dani Pedroza, ndërsa reshjet e shiut karakterizuan kualifikueset e Çmimit të Madh të Holandës në MotoGP.

Në minutat e fundit, dukej sikur Stoner do të duhej të kënaqej me vendin e 9-të në vijën e nisjes, ndërsa Pedroza do të ishte i pari, sepse pritej që pista të qëndronte e lagur nga shiu derisa të valëvitej flamuri i përfundimit të provave zyrtare.

Por çuditërisht dolën disa rreze dielli që thanë pistën dhe i dhanë mundësinë pilotëve të përmirësonin kohët e tyre, me Stoner që regjistroi 1’33”.713 që të kalonte shokun e skuadrës dhe të çonte rivalin kryesor për titull, Horge Lorencon me Jamaha, në vendin e tretë.

Në vendin e katërt në vijën e nisjes do të jetë Stefan Bradl me Honda LCR, pozicioni më i mirë në nisje në karrierën e tij në këtë kategori për ish-kampionin e Moto 2. Kal Kraçlou është i pesti me Tek 3 Jamaha, para Spis me Jamahan zyrtare dhe shokut të tij të skuadrës, Andrea Doviciozo.

Vetëm vendi i 9 dhe 10 për dy motorët Dukati, ku Niki Hejden këtë radhë do të jetë një pozicion para Valentino Rosit. (LajmeShqip.com)