Presidenti i Interit, Masimo Morati, nuk terhiqet asnjëherë kur bëhet fjalë për polemika në distancë me Juvantusin. Këtë e ka treguar duke folur për çështjen e fundit që ka shpërthyer mes dy skuadrave, atë të yllit të tretë që bardhezinjtë kërkojnë të vënë në fanellë pasi pretendojnë se kanë 30 tituj kampion dhe jo 28.

Kuptohet që një gjest i tillë do të ishte një sfidë direkte ndaj Inter, që ka fituar në tavolinë një prej 2 titujve që i janë hequr Juventusit pas procesit “Calciopoli”. “Nëse Juventusi do të vendosë 3 yje në fanellë, do të ketë fantazi në ndërtimin e fanellave nga çdo skuadër, ashtu si është fantazi iniciativa e tyre. Të gjithë do të bëjnë atë që dëshirojnë”, ka bërë të ditur presidenti i zikaltërve duke nënkuptuar që me precedentin e bardhezinjve, ekipet e tjera mund të vendosin yje në fanella edhe për turnetë miqësorë.

Më pas, ai ka folur për merkaton e klubit, duke përmendur disa nga emrat e lojtarëve që mund të largohen, ashtu si edhe ata që mund të afrohen.

“Shnajder e cilësojmë si një lojtar qendror në atë që mund të jetë e ardhmja e Interit, ndaj me të nuk ka asnjë problem. Lusio na ka lënë të kuptohet këto ditë që është pak i mërzitur ndaj do të shohim nëse për të është më mirë të ndryshojë skuadër. Forlan? Lojtarët rrinë me kënaqësi te Inter, por pastaj na duhet të shohim nëse një gjë e tillë do të ndodhë apo nëse është më e mira për ta të shkojnë të luajnë në ndonjë skuadër tjetër”.

“Laveci? Për momentin, ajo që mendoj është se ky transferim, nëse do të realizohet, duhet kryer me shumë qetësi dhe kujdes në aspektin ekonomik”, tregoi presidenti i zikaltërve, duke lënë të kuptohet se Interi nuk ka ndër mend të shpenzojë shuma të çmendura për argjentinasin. (LajmeShqip.com)