Masimo Morati ka vendosur të ndjekë nga afër miqësoren e parë sezonale të Interit, që ka mundur 6-0 Trentinon, por dukej qartë që ai nuk e kishte mendjen te ndeshja, por te ndryshimet që po pëson skuadra zikaltër. Presidenti i Interit ka konfirmuar largime të tjera nga radhët e kësaj skuadre, duke filluar nga sulmuesi Pacini, i cili është në pritje të ofertës së duhur.

“Ai ka një karakter që tregon dëshirë për të luajtur, e dimë një gjë të tillë. Por ka disa nevoja teknike dhe taktike që bëjnë të mundur blerjen apo shitjen e lojtarëve. Por sigurisht që më vjen keq për këtë situatë që është krijuar me të”, tha presidenti i zikaltërve duke lënë të kuptohet se sulmuesi nuk bën pjesë në skemat e Stramaçionit.

Shnajder është kthyer në një nga emrat më të përfolur të ditëve të fundit, pasi flitet për një interesim ndaj tij nga ana e Anzhi në Rusi. “Si Eto’o në Rusi? Nuk e di nëse mund të quhet rrezik… edhe mund të ekzistojnë, por unë personalisht e vlerësoj si shumë vendimtar për Interin, pavarësisht interesimit që ka për të nga skuadra të tjera”.

“Maikon është ndër lojtarët më të fortë në botë dhe jemi shumë të lidhur me të. Stankoviç? Do të shohim si do të veprojmë me të gjithë këta lojtarë. Mendoj se çfarëdo lloj gjëje që mund të ndodhë, nuk heq aspak mirënjohjen ndaj veteranëve për atë që kanë bërë me këtë skuadër. Në merkato do të bëjmë gjëra që kanë sens, pasi fillimisht po mendojmë për largimet e më pas do të shohim kërkesat e Stramaçionit”, konfirmoi presidenti i Interit. (LajmeShqip.com)