Nëntori do ta sjellë një spektakël të madh shqiptar. Pas Tiranës, Kombëtarja Shqiptare pas pak javësh do të zbarkojë edhe në Prishtinë për ta festuar bashkë me tifozët kosovarë kualifikimin në Kampionatin Evropian “Franca 2016”.

FSHF-ja i ka thënë “Zërit” se kuqezinjtë planifikojnë ta zhvillojnë edhe një miqësore me Kosovën

Kombëtarja Shqiptare të hënën u kthye në Tiranë nga Armenia, ku e siguroi kualifikimin në Kampionatin Evropian “Franca 2016”. Kuqezinjtë u pritën si heronj nga mijëra shqiptarë të tubuar në sheshin “Nënë Tereza”, ku bashkërisht e festuan në mënyrë madhështore suksesin historik, shkruan sot gazeta Zëri.

Njëkohësisht festë kishte edhe në Prishtinë, derisa qytetarët e Kosovës lakmonin prezencën e kuqezinjve edhe në kryeqytetin kosovar. Madje, kryetari i Komunës së Prishtinës, Shpend Ahmeti, u bëri ftesë publike kuqezinjve, e po ashtu edhe Federata e Futbollit e Kosovës (FFK) u uroi mirëseardhje yjeve të futbollit shqiptar, ndërsa qytetarët kishin nevojë të madhe për t’i pasur afër tyre Gianni De Biasin dhe futbollistët e tij, të paktën disa orë. Megjithëkëtë, Tirana ishte stacioni i vetëm i Kombëtares.

Federata Shqiptare e Futbollit (FSHF) e ka marrë në konsideratë ftesën e kosovarëve, te të cilët shpreson që të hasë në mirëkuptim që nuk mundi t’ua plotësojë dëshirën e madhe për t’ua sjellë Kombëtaren në Prishtinë. “Sinqerisht ishte e pamundur. Kësaj here lojtarët nuk kishin mundësi, sepse do të largohen drejt klubeve të tyre për të cilat luajnë”, deklaroi për “Zërin” Jona Dervishi, drejtoresha e departamentit të marrëdhënieve me publikun pranë FSHF-së.

Mirëpo, Jona Dervishi konfirmoi për “Zërin” se në muajin e ardhshëm Kombëtarja do të zbarkojë edhe në Prishtinë, ku pritet ta zhvillojë edhe një miqësore me përfaqësuesen e Kosovës. “Mendoj që Kombëtarja do të vijë herën tjetër në Prishtinë, për ndeshjen miqësore në nëntor”, theksoi ajo.

Spektakli i madh në Prishtinë pritet të bëhet diku mes datave 9 dhe 17 nëntor, data këto të lira për Kombëtare. Gjatë atyre ditëve kuqezinjtë pritet t’i zhvillojnë dy miqësore – një me Kosovën e një tjetër me Poloninë apo ndonjë shtet tjetër.

Pa dyshim, ky takim do të jetë emocionues për futbollistët e të dyja ekipeve, sidomos për lojtarët e Kombëtares që janë nga Kosova. Aktualisht për Shqipërinë luajnë 14 futbollistë kosovarë: Etrit Berisha, Lorik Cana, Arlind Ajeti, Mërgim Mavraj, Amir Rrahmani, Amir Abrashi, Migjen Basha, Ermir Lenjani, Burim Kukeli, Alban Meha, Shkëlzen Gashi, Taulant Xhaka, Herolind Shala, Valdet Rama dhe disa të tjerë që ftohen herë pas here.

Ditë më parë, edhe përzgjedhësi i Shqipërisë, Gianni De Biasi, i pati thënë “Zërit” se me dëshirë do ta zhvillonte një miqësore me Kosovën. Por, ai ishte skeptik që një ndeshje e tillë mund të organizohet shpejt, por tani kur Shqipëria e ka siguruar kualifikimin në “Euro 2016” situata ka ndryshuar. Kuqezinjtë e ndjejnë për obligim që sa më shpejt të zbarkojnë edhe në Kosovë. /Zëri/