Natë e jashtëzakonshme rekordesh në Oklahoma ku vendasit kanë mundur pas dy kohëve shtesë Minesotan me rezultatin 149-140. Rasëll Uestbruk me 45 pikë (6 pasime, 4 topa në tabelë) dhe Kevin Durant me 40 pikë (17 topa në tabelë, 5 pasime), u bënë dyshja e parë e të njëjtës skuadër në NBA që shënojnë të paktën 40 pikë secili në dy ndeshje të njëjtit sezon. Kjo paraqitje e tyre e jashtëzakonshme bëri të pavlefshme paraqitjen monstruoze të Kevin Lëv nga ana tjetër e fushës, më e mira në karrierën e tij, pasi ylli i Minesotas regjistroi 51 pikë e 14 topa në tabelë, i ndihmuar nga Barea me 25 pikë, 10 topa në tabelë dhe 14 pasime. 

LA Leikërs duket se kanë rregulluar problemet e tyre që pas nënshkrimit me Robert Seshëns, i cili në ndeshjen e tij të parë si titullar regjistroi 20 pikë e 11 pasime në fitoren 103-96 ndaj Portland. Me afrimin e tij, kalifornianët duken përsëri një skuadër e rrezikshme dhe janë kthyer në një ekip pretendent për të fituar një tjetër titull.

Derbi i Teksasit i ka shkuar San Antonio që ka mundur kampionët në fuqi të Dallas me rezultatin 104-87. San Antonios i mungonte Toni Parker për shkak dëmtimi, por Grin që e zëvendësoi në formacion ishte po aq efektiv me 18 pikë, 6 topa në tabelë dhe 6 pasime. Kjo humbje i Dallas ka vështirësuar pozitën e kampionëve në fuqi të cilët rrezikojnë në mënyrë të pabesueshme që të mos marrin pjesë në playoff. Ata janë një nga 5 skuadrat që luftojnë për tre vendet e fundit në zonën e playoff për Konferencën e Perëndimit. (LajmeShqip.com)

Rezultatet

Miluoki-Sharlot            112-92

Feniks-Indiana             113-111

Nju Jork-Toronto         79-96

Kliveland-Orlando        80-93

Nju Xhersi-Atlanta       84-93

Majemi-Detroit            88-73

Boston-Filadelfia          86-99

Minesota-Oklahoma     140-149

Dallas-San Antonio       87-104

Denver-Utah                102-121

Portland-LA Leikërs     96-103