Lionel Mesi ka shprehur kënaqësinë e tij për sintoninë në rritje që ka me Gonzalo Higuain, pasi kjo dyshe sulmuesish po udhëheq Argjentinën drejt sukseseve të rëndësishme si ai 3-0 ndaj Venezuelës ku ata ishin autorë të tre golave të sfidës.

“Higuain është një lojtar i madh, pasi shënon shumë gola. Sa herë që luajmë, sintonia mes nesh rritet. Të luajmë bashkë është një gëzim që e ndajmë edhe me shokët e kombëtares së Argjentinës. Për ne, gjëja më e rëndësishme është të fitojmë dhe jo kush shënon golat apo jep pasimet”, shpjegoi Mesi pas ndeshjes.

I të njëjtit mendim është edhe Higuain, i cili sheh me optimizëm të ardhmen në kombëtaren argjentinase, pasi në radhët e saj janë shumë yje në repartin e avancuar.

“Sa herë që Leo sheh përpara, e di që unë jam një opsion për të pasuar topin, ashtu siç ndodh edhe me Lavecin. Ne jemi të lumtur se i dhamë këtë fitore tifozëve tanë që mbushën stadiumin. Prej disa kohësh kemi luajtur mirë dhe kemi fituar në fushën tonë, ndërsa kemi arritur të sigurojmë edhe një distancë sigurie në kualifikueset e Botërorit 2014.

Tani Argjentina ka një detyrë të vështirë pasi të martën do të ndeshet në La Paz me Bolivinë vendase, një skuadër mjaft e fortë në fushën e saj. Mjafton të kujtohet që herën e fundit kur Argjentina ka luajtur në La Paz, në vitin 2009, është mundur me rezultatin e thellë 6-1.

“Ndeshjet që po luajmë po bëhen gjithnjë e më të vështira. Duhet të bëhemi gati për një atmosferë të ndezur në La Paz pasi e dimë se çfarë ndodhi herën e fundit që ishim aty. Personalisht, ishte shumë e vështirë ta merrnim veten pas asaj humbje”, deklaroi Mesi. (LajmeShqip.com)