Lionel Mesi ka kritikuar ashpër të gjitha skuadrat që luajnë vetëm me mendjen te fitorja, duke deklaruar se argëtimi është objektivi kryesor i lojës së futbollit.

Argjentinasi, i cili vlerësohet si futbollisti më i mirë në botë dhe mund të bëhet një nga legjendat e të gjitha kohërave, është ylli i Barcelonës dhe është në qendër të lojës  ‘tiki-taka’ që ka marrë vlerësime nga media dhe tifozët për mënyrën spektakolare që mundohet të imponojë gjatë ndeshjes.

Por klubi katalanas përfundoi pas Real Madrid në kampionatin spanjoll dhe u eliminua nga Çelsi në gjysmëfinalet e Ligës së Kampioneve, ndonëse ka dhuruar spektakël dhe nga të gjithë shihet si ekipi më i mirë në botë. Në të dy rastet, kundërshtarët e Barcelonës janë kritikuar për lojën e mbrojtjes ekstreme, të njohur si “parkim autobusi”.

“Futbolli është një lojë. Unë mundohem të argëtohem në fushë, gjithmonë, sa herë që luaj”, tregoi Mesi për “Times”. “Kjo është arseja pse unë luaj. Ditën që nuk do të argëtohem më, atëherë do të braktis futbollin… Nuk dua asnjëherë ta humb atë shkëndijë, atë pasion për lojën”.

“Sot skuadrat luajnë në mënyrë më statike, më shumë për rezultatin përfundimtar se sa për të dhuruar futboll të mirë. Për ata është më e rëndësishme të fitojnë se të luajnë mirë. Por ne na duhen më shumë lojtarë që luajnë me pasion, për të mirën e futbollit”, tha argjentinasi. (LajmeShqip.com)