Bepe Marota ka hedhur poshtë zërat se Juventusi po ndjek me vëmendje situatën e Didier Drogba, i cili mendohet se ka prishur marrëdhëniet me Shangai Shanhua dhe do të kthehet përsëri në Evropë. Futbollisti afrikan është raportuar si një nga objektivat e mundshëm të merkatos së bardhezinjve, pasi ata po kërkojnë një golashënues të mirëfilltë dhe ish-lojtari i Çelsit duket si personi i duhur për këtë rol.

Por para ndeshjes me Kaljarin, Marota bëri të qartë se kjo nuk ishte një hipotezë reale, pasi klubi nuk po kërkonte një lojtar i cili do të qëndronte i shkëputur për shumë kohë në Kupën e Afrikës.

“Drogba? Nuk e di nga kush ka lindur kjo ide, por ne nuk kemi pasur asnjë kontakt me të. Kjo ka ardhur pjesërisht edhe për faktin se ai luan në Kupën e Afrikës dhe do të jetë larg Evropës për një periudhë të gjatë”, tha drejtuesi i bardhezinjve, i cili bëri të qartë se një blerje e mundshme mund të bëhej në repartin e mbrojtjes.

“Për shkak të largimit të Lucio dhe dëmtimit të Kielinit, ne po kërkojmë një lojtar për mbrojtjen. Në sulm vazhdojmë të jemi të vëmendshëm pasi marrim pjesë në Ligën e Kampioneve. Por duhet të respektojmë edhe grupin aktual të lojtarëve. Jo rastësisht, jemi skuadra që ka shënuar më shumë gola në këtë sezon në Itali”, tha ai. (LajmeShqip.com)