Revista prestigjioze amerikane “Time” ka vendosur për muajin dhjetor në kopertinën e saj sulmuesin italian Mario Baloteli, një nderim shumë i madh për futbollistin e Mançester Sitit duke patur parasysh se janë të pakët ata futbollistë që deri tani kanë patur luksin të kenë këtë publicitet në SHBA.

Në intervistën e tij, ai ka folur jo vetëm për futbollin, por edhe për tema të ndryshme, duke filluar nga racizmi dhe integrimi i një djaloshi me ngjyrë në një kulturë tjetër.

“Racizmin e kam njohur vetëm pasi erdhi fama ime si futbollist. Tani, një nga ëndrrat e mia është të takoj presidentin e SHBA, Barak Obama”, është një ekstrakt i shkurtër i intervistës së plotë që do të shfaqet në këtë edicion të revistës së famshme amerikane.

Kurioziteti më i madh për të gjithë të pasionuarit e futbollit është se si Baloteli në karrierën e tij si profesionist nuk ka gabuar ende asnjë penallti të gjuajtur, ndërsa edhe ai që cilësohet si futbollisti më i mirë në botë, Lionel Mesi, ka një mesatare realizimi prej 82%.

“Penalltia është një lojë psikologjike mes meje dhe portierit. Unë di si të kontrolloj trurin tim. Kur portieri lëviz para meje, do të thotë se ka humbur”, është batuta e sulmuesit italian. (LajmeShqip.com)