Trajneri i Mançester Sitit, Roberto Mançini, mendon se skuadra e tij nuk e meriton të qëndrojë 15 pikë prapa Mançester Junajtid në renditjen e kampionatit, duke insistuar se tabela e klasifikimit “nuk është e drejtë”. Dy skuadrat vihen përballë njëra-tjetrës të hënën në derbin e ethshëm të Mançesterit, ku Siti do të udhëtojë në “Old Traford” për të kërkuar të mposhtë Junajtid, që nuk njeh humbje në kampionat që në nëntor.

“Nuk e meritojmë të jemi 15 pikë pas tyre në renditje”, tha Mançini para gazetarëve. “Junajtid ka luajtur shumë mirë dhe ka fituar shumë ndeshje. Ata janë të pamposhtur në 18 ndeshjet e tyre të fundit në kampionat dhe humbja e tyre e fundit ishte përballë Noruiç. Ndaj ata e meritojnë të jenë në kreun e renditjes. Por jo me 15 pikë diferencë, kjo nuk është tabela reale e klasifikimit”.

“Ne tani na mbeten edhe 8 ndeshje. Nëse luajmë mirë dhe fitojmë shumë nga këto ndeshje, ndoshta mund të shkurtojmë diferencën. Ky duhet të jetë objektivi ynë për momentin”, tha trajneri italian. (LajmeShqip.com)