Futbollisti i kombëtares shqiptare dhe i klubit turk Gallatasaraj, Lorik Cana, është sportisti shqiptar më i paguar në botë, sipas revistës amerikane “ESPN.

Sipas një studimi të bërë nga revista amerikane “ESPN”, janë plot 2.5 milionë dollarë që ai i fut në xhep çdo vit, të paktën sipas kontratës aktuale.

Cana ka një kontratë të majme tek Gallatasaraji në Turqi, ndërsa ka qenë po ashtu mjaft i paguar në Angli kur luante për Sandërlendin. Revista amerikane “ESPN”, bazohet vetëm tek kontrata sportive dhe jo tek kontratat e sponsorizimeve.

Për një vend ku sporti paguhet  pak dhe që i ka të pakët përfaqësuesit në elitën sportive ndërkombëtare, arritja e Canës nuk është aspak e vogël. Futbollistë si Erion Bogdani, Hamdi Salihi apo edhe Altin Lala e ndjekin ish-kapitenin marsejez nga një distancë tepër e madhe, duke qenë të gjithë poshtë 1-milion dollarëshit.

Ndërsa Shqipëria vazhdon të jetë e nënpaguar në krahasim me vendet fqinje, nëse shikon se më i paguari i Malit të Zi është Mirko Vuçiniç, futbollisti i Romës me 6.02 milionë dollarë në vit, më i paguari i Serbisë është basketbollisti Peja Stojakoviç me 15.6 milionë, më i paguari i Kroacisë është futbollisti i Totenhamit, Luka Modriç, me 4.9 milionë dollarë, më i paguari i Maqedonisë është po një futbollist, Goran Pandev i Interit me 4.25 milionë dollarë, ndërsa më i paguari i Bosnjë-Hercegovinës është sulmuesi i Mançester Sitit, Edin Xheko me 8.47 milionë dollarë të ardhura në vit.

Më i paguari sportist në botë është bejsbollisti amerikan Aleks Rodrigez dhe boksieri nga Filipinet, Mani Pakiao, me nga 32 milionë dollarë secili. Në vende të tilla si Gjermania, Anglia, Spanja, Rusia apo Kina, më të paguarit nuk janë futbollistë.

Basketbollisti Dirk Novicki është më i paguari në Gjermani me 17.3 milionë dollarë, Ljuis Hamilton është ai me më shumë fitime në Angli me 18.5 milionë, ferraristi Fernando Alonso fiton 22.7 milionë dollarë në Spanjë, basketbollisti Andrei Kirilenko është më i paguari ndër rusët me 17.8 milionë dhe po basketbollisti Jao Ming është më i paguari i sportistëve kinezë me 17.7 milionë dollarë.

Më i varferi ndër këta të pasur është futbollisti Xhekson nga Ishulli Niue i Oqeanit Paqësor që fiton 5 000 dollarë në vit, duke qenë i pari në shtetin e tij.