Hondurasi ka dhuruar surprizën më të madhe të turneut të futbollit në Lojërat Olimpike duke eliminuar Spanjën. Iberikët ishin mundur 1-0 në ndeshjen e parë nga Japonia dhe një rezultat identik përballë skuadrës së Honduras i nxori ata matematikisht jashtë turneut. 

Gjithçka është vendosur në minutat e para të takimit kur Xherri Bengston shënoi me kokë golin e vetëm të ndeshjes për t’i dhënë suksesin skuadrës së tij. Pavarësisht tentativave të futbollistëve spanjollë për të përmbysur gjithçka, skuadra e Amerikës Qendrore arriti t’i rezistonte sulmeve të njëpasnjëshme deri në fundin e ndeshjes.

Nëse një favorite për medaljen e artë largohet shumë shpejt, një tjetër ecën pa ndalesa drejt një suksesi që për momentin duket i padiskutueshëm. Brazili ka përmbysur disavantazhin e minutave të para përballë Bjellorusisë duke fituar takimin me rezultatin 3-1. Kanë qenë Pato, Neimar dhe Oskar që kanë shpërbërë mbrojtjen bjelloruse duke siguruar kalimin në turin tjetër të seleçaos, që mbetet kandidatja më e fortë për të fituar medaljen e artë.

Edhe Britania e Madhe ka arritur të bëjë një hap të rëndësishëm para duke mundur 3-1 Emiratet e Bashkuara Arabe falë golave të Gigs, Sinkler dhe Starrixh. (LajmeShqip.com)

REZULTATET

GRUPI A

Senegal-Uruguai           2-0

Britani e Madhe-EBA   3-1

GRUPI B

Meksikë-Gabon           2-0

Kore J.-Zvicër  2-1

GRUPI C

Egjipt-Zelandë e Re      1-1

Brazil-Bjellorusi            3-1

GRUPI D

Japoni-Marok              1-0

Spanjë-Honduras         0-1